استانا جانە ەريەۆان اراسىندا العاشقى اۋە رەيسى اشىلدى
تاسىمالداۋشى قازاقستاندىق «SCAT Airlines» اۋە كومپانياسى. ساپار اپتاسىنا ەكى رەت - سارسەنبى جانە سەنبى كۇندەرى جولاۋشىلار ءۇشىن قولايلى كۇندىزگى ۋاقىتتاردا بوينگ 737 ۇشاعى ارقىلى جۇزەگە اسىرىلادى.
سونىمەن قاتار، ساپار ۇزاقتىعى 3 ساعات 40 مينۋتتى قۇرايدى، دەپ حابارلايدى «قازاقپارات» ح ا ا ءتىلشىسى.
ەريەۆان «زۆارتنوتس» اۋەجايىندا استانا-ەريەۆان تىكەلەي العاشقى رەيسىن سالتاناتتى تۇردە قارسى الۋ ءراسىمى وتكىزىلدى.
سالتاناتتى شاراعا قاتىسقان ارمەنياداعى قازاقستاننىڭ توتەنشە جانە وكىلەتتى ەلشىسى تيمۋر ورازايەۆ ەكى قالا اراسىن جالعايتىن اۋە بايلانىسى ەكى مەملەكەت وكىلدەرىنىڭ اراسىنداعى ىسكەرلىك بايلانىستاردى ارتتىرۋعا وڭ ىقپال ەتەتىندىگىنە سەنىم ءبىلدىردى.
«مەنىڭ بۇل تاماشا ەلگە كەلگەنىمە ءبىر جىل تولعاننان كەيىن، ارميان جانە قازاقستاندىق قوعامنىڭ ءوتىنىشىن ەسكەرە كەلە، ارمەنيا جانە قازاقستان استانالارىن بايلانىستىراتىن اۋە قاتىناسىن اشۋ مۇمكىندىگى بۇيىردى»، - دەدى تيمۋر ورازايەۆ العاشقى رەيسكە ارنالعان باسپا ءسوز ءماسليحاتى بارىسىندا.
ەلشى ت. ورازايەۆتىڭ ايتۋىنشا، قازاقستان جانە ارمەنيا اراسىن بايلانىستىراتىن تىكەلەي رەيس ەكسپو-2017 كورمەسى قارساڭىندا اشىلۋى كەزدەيسوق ەمەس. وسى كەزدە تۋريستەردىڭ ارمەنياعا دا اعىلادى دەپ كۇتىلۋدە.
