قاراعاندىدا اتى شۋلى شەنەۋنىك قاماۋعا الىندى
سۋديا شەرۆان ايۋبەكوۆا تەرگەۋ ورگاندارىنا كۇدىكتىنى ەكى اي قاماۋدا ۇستاۋعا رۇقسات بەردى.
قىلمىستىق-پروتسەسسۋالدىق كودەكستە تاپ وسىنداي مەرزىم قاراستىرىلعان. تەمىرتاۋ قالالىق سوتىنىڭ باسپا ءسوز قىزمەتىندەگىلەردىڭ حابارلاۋىنشا، سۋديا كۇدىكتىگە 500 ايلىق ەسەپتىك كورسەتكىش كولەمىندە اقشا تولەپ، تەرگەۋ ۋاقىتىندا «كەپىل» شاراسى بويىنشا جۇرۋگە رۇقسات ەتتى.
«سوت 500 ايلىق ەسەپتىك كورسەتكىش كولەمىندە كەپىلدىككە اقشا تولەۋ قۇقىن بەرە وتىرىپ، ەكى ايعا قاماۋعا الۋ قاجەت دەپ شەشتى. سوت سانكسيالاۋ كەزىندە دالەلدەر مەن قاماۋداعى ادامنىڭ كىنالى ەكەندىگىنە باعا بەرمەيدى»، - دەپ ءتۇسىندىردى باسپا ءسوز قىزمەتىندەگىلەر.
وسىعان دەيىن، «وقجەتپەس ت» كوممۋنالدىق كاسىپورنىنىڭ ديرەكتورى ەرلان وتەشوۆتىڭ بيۋدجەت قارجىسىن جىمقىرعانى تۋرالى حابارلانعان بولاتىن.
وعان قىلمىستىق كودەكستىڭ 189- بابى مەن 3- ءبولىمى نەگىزىندە وزىنە سەنىپ تاپسىرىلعان مۇلىكتى يەمدەنىپ قارجى جىمقىردى دەگەن ايىپ تاعىلىپ وتىر. الدىن الا تەرگەۋ امالدارى بويىنشا، ەرلان وتەشوۆ تەمىرتاۋ جىلۋ جانە سۋ ماگيسترالدارىنداعى قۇبىرلاردى اۋىستىرۋ ءۇشىن ولاردى جوعارى باعامەن ساتىپ الۋ شاراسىن ۇيىداستىرىپ، قارجىنىڭ ءبىرقاتار بولىگىن يەمدەنىپ العان.
سونىمەن قاتار اتالمىش شەنەۋنىك ىشىمدىككە سىلقيا تويىپ الىپ، كولىك جۇرگىزىپ جول اپاتىنا سەبەپشى بولعان جانە وسى اپاتتىڭ سالدارىنان 1 ايەل قايتىس بولىپ، ەكى ادام زارداپ شەككەننەن كەيىن ەرەكشە «تانىمال» بولعان ەدى.
سونىڭ سالدارىنان وتەشوۆ قاراعاندى وبلىسى ەنەرگەتيكا باسقارماسىنىڭ باسشىسى قىزمەتىنەن بوساتىلىپ، «نۇر وتان» پارتيالىق بيلەتى مەن جۇرگىزۋشى كۋالىگىنەن 4 جىلعا اجىراعان بولاتىن. ال جول اپاتىنا بايلانىستى ءىس ەكى تاراپتىڭ مامىلەگە كەلۋىنە بايلانىستى توقتاتىلعان ەدى.
