استانادا ورتالىق ازياداعى ەڭ ۇلكەن تەڭىز جانۋارلارىنىڭ ساياباعى اشىلدى - فوتو
استانا. قازاقپارات - وتباسىلىق ويىن- ساۋىق ساياباعىنىڭ جالپى اۋماعى 7190 شارشى مەتر. مۇندا كورسەتىلىم ءۇشىن ۇلكەن باسسەين قويىلعان، قوسىمشا تاعى ەكى باسسەين - كارانتين جانە جارعاقتاباندىلار ءۇشىن قاراستىرىلىپتى، 400 ادامعا ارنالعان تريبۋنا جانە مۇمكىندىگى شەكتەلگەن جاندارعا ارنالعان ارنايى ورىندار بار، دەپ حابارلايدى استانا اكىمدىگىنىڭ سايتى.
تەڭىز جانۋارلارى پاركىنىڭ ارتىستەرى 4 دەلفين (افالين ءتۇرى) جانە 3 تەڭىز مىسىعىمەن ونەر كورسەتەدى. 40-تان استام ءتۇرلى ەلەمەنت تاڭعاجايىپ شوۋ بارىسىندا كورەرمەن نازارىنا ۇسىنىلماق.
«ەكسپو- 2017 حالىقارالىق كورمەسىنىڭ اشىلۋ قارساڭىندا بۇگىن قالامىزدا ەڭ ۇلكەن تەڭىز جانۋارلارىنىڭ پاركى اشىلىپ وتىر. بۇل مادەني- تاريحي وقيعا. ويتكەنى، تەڭىز جانۋارلارى قايتالانباس، ەرەكشە شوۋ كورسەتەدى. بۇگىن شاراعا 400-گە جۋىق ءبۇلدىرشىن كەلدى، ولاردىڭ اراسىندا مۇمكىندىكتەرى شەكتەۋلى 100-گە جۋىق بالالار دا بار»، - دەدى «نۇر وتان» پارتياسى قالالىق فيليالىنىڭ ورىنباسارى ۆلاديسلاۆ سەرگەيەۆ.
قالا تۇرعىنى ءلاززات بەرسەبايەۆا مۇنداي وتباسىلىق ويىن- ساۋىق ساياباعىن العاش كورىپ وتىرعانىن ايتتى. ول پارككە ەكى بالاسىمەن كەلگەن. دەلفيندەر مەن تەڭىز مىسىقتارىنىڭ ونەرىنە بالالار تۇگىلى ۇلكەندەر دە تاڭداي قاقتى.
