سەناتورلار جول قوزعالىسى جونىندەگى زاڭ جوباسىنا تۇزەتۋلەر ەنگىزبەك

استانا. قازاقپارات - بۇگىن ق ر پارلامەنتى سەناتى كونستيتۋتسيالىق زاڭناما، سوت جۇيەسى جانە قۇقىق قورعاۋ ورگاندارى جونىندەگى كوميتەتىنىڭ كەڭەيتىلگەن وتىرىسىندا «جول قوزعالىسى ماسەلەلەرى جونىندەگى ق ر- نىڭ كەيبىر زاڭنامالىق اكتىلەرىنە وزگەرتۋلەر مەن تولىقتىرۋلار ەنگىزۋ تۋرالى» زاڭ جوباسى قارالدى، دەپ حابارلايدى قازاقپارات.

 «ءبىز پوليتسيا قىزمەتكەرى توقتاتقان كەزدە جۇرگىزۋشىنىڭ كولىكتەن تۇسپەۋىنە قاتىستى جاعدايدى تۇزەتكىمىز كەلەدى. ءبىراق، بۇل تەك جولاۋشىلارعا عانا قاتىستى. ويتكەنى جۇرگىزۋشىمەن قاتار جولاۋشىنىڭ دا پوليتسيا رۇقساتىنسىز كولىكتەن تۇسۋىنە تىيىم سالىنعان. ءبىزدىڭ ويىمىزشا، بەلگىسىز ۋاقىتقا ادامداردى كولىكتى قاماپ قويۋ دۇرىس ەمەس. سوندىقتان ءبىز وسى تۇزەتۋدى ەنگىزىپ وتىرمىز»، - دەدى كوميتەت وتىرىسىندا زاڭ جوباسىن تانىستىرعان ءماجىلىس دەپۋتاتى ۆلاديسلاۆ كوساريەۆ.

 سونىمەن قاتار ول ءماجىلىس دەپۋتاتتارى جۇرگىزۋشىنىڭ تەك رۇقسات بەلگىسى بار جەرگە عانا توقتاۋى قاجەتتىگى كورسەتىلگەن نورماعا دا قارسىلىق تانىتقانىن اتاپ ءوتتى.

 «جەرىمىز ۇلانعايىر، بەلگىنى كەز كەلگەن جەرگە قويا المايمىز. ال مۇنى پوليتسيا قىزمەتكەرلەرى پايدالانىپ، كەز كەلگەن جەردە نارازىلىق تانىتۋى مۇمكىن. ءبىز سوندىقتان بۇل نورمانى الىپ تاستاۋعا شەشىم قابىلدادىق جانە ول شاعىن كاسىپورىنداردىڭ قىزمەتىن جەتىلدىرۋ تۋرالى زاڭمەن الىنىپ تاستالدى. بۇل زاڭ جوباسى ارقىلى ءبىز جۇرگىزۋشى مەن جول پوليتسياسى قىزمەتكەرلەرى اراسىنداعى ءوزارا قارىم- قاتىناستى جاقسارتۋ ماقساتىندا جۇمىس ىستەدىك. زاڭدا كولىكتى توقتاتقان پوليتسيا قىزمەتكەرى بىردەن جۇرگىزۋشىگە كەلۋىن، نە ءۇشىن توقتاتقاندىعىن ءتۇسىندىرۋىن، بۇزۋشىلىققا قاتىستى قۇجاتتى نەمەسە ۆيدەو جازبانى ۇسىنۋىن جازدىق. بۇعان قوسا جۇرگىزۋشىلەرگە ۆيدەوعا تۇسىرۋگە رۇقسات بەرىلەدى. بۇل جۇرگىزۋشى مەن پوليتسيا قىزمەتكەرى اراسىنداعى دەموكراتيالىق قارىم- قاتىناستى دامىتا تۇسپەك»، - دەدى كوساريەۆ. جوعارى پالاتا دەپۋتاتتارى زاڭ جوباسىن قولداپ، سەناتتىڭ جالپى وتىرىسىنا شىعارۋعا كەلىستى.

 اۆتور: مارلان جيەمباي