بەيبىت ىستىبايەۆ بيىلعى «قازاقستان بارىسىنان» ءوز ەركىمەن باس تارتتى - سارسەن قۇرانبەك
بۇل تۋرالى قازاقپارات تىلشىسىنە ق ر قازاق كۇرەسى فەدەراتسياسىنىڭ ءبىرىنشى ۆيتسە-پرەزيدەنتى سارسەن قۇرانبەك ءمالىم ەتتى.
- وسىمەن جەتىنشى مارتە جالاۋى جەلبىرەگەلى وتىرعان قازاق كۇرەسىنەن «قازاقستان بارىسى» تۋرنيرىنىڭ فينالىنا جولداما العان بالۋاندار تولىعىمەن انىقتالدى. ءبىز ءداستۇر بويىنشا الدىمەن اۋىلدىق، اۋداندىق، ودان كەيىن وبلىستىق بەلدەسۋلەردەن ىرىكتەلىپ شىققان بالۋاندارعا عانا فينالدىق ايقاسقا جولداما بەردىك.
ەندى، شىلدەنىڭ 2 ءسى كۇنى ەلىمىزدىڭ 14 وبلىسى مەن استانا، الماتى قالالارىندا جەڭىمپاز اتانعان 34 بالۋاننىڭ ىشىندەگى ەڭ مىقتىسىن، ياعني «قازاقستان بارىسى-2017» اتاعىنىڭ يەگەرى كىم بولاتىنىن ەلوردا تۇرعىندارى مەن قالا قوناقتارى ءوز كوزدەرىمەن كورەتىن بولادى. مۇمكىن بيىل جاڭا چەمپيون شىعىپ قالۋى دا عاجاپ ەمەس. ءۇش رەت «قازاقستان بارىسى» اتانعان بەيبىت ىستىبايەۆ بيىل ءوز ەركىمەن تۋرنيرگە قاتىسۋدان باس تارتتى.
- نە سەبەپتى باس تارتقانى تۋرالى تولىعىراق ايتىپ وتسەڭىز...
- ول بۇرىندارى ءۇش دۇركىن «قازاقستان بارىسى» اتانسام بولدى دەپ الدىنا ماقسات قويعان. سول دەگەنىنە قول جەتكىزدى. العاش رەت 2012-جىلى چەمپيون اتانسا، اراعا ەكى جىل سالىپ، 2015 جانە 2016-جىلدارى قاتارىنان باس بەلدىكتى قانجىعاسىنا بايلاپ، ءۇش دۇركىن جەڭىمپاز اتاعىنا قول جەتكىزدى. بيىل دەمالايىن دەگەن بولۋ كەرەك. بۇل تۋرنيرگە قاتىسۋ-قاتىسپاۋ ءار بالۋاننىڭ ءوز ەركى. ەشكىم-ەشكىمدى كۇشپەن جارىسقا قاتىستىرمايدى. سوندىقتان ءبىز بەيبىتتىڭ شەشىمىنە كەلىسىم بەردىك.
- كەلەسى جىلى قايتا قاتىسامىن دەسە دە ءوز ەركى عوي...
- ارينە! ءبىراق، كەلەسى جىلى قاتىسامىن دەسە، وزگە بالۋاندار سياقتى ىرىكتەۋگە قاتىسىپ، وبلىستىق جارىستا جەڭىپ شىعۋى كەرەك. ال بيىل وتكەن جىلى چەمپيون بولعانى ءۇشىن ىرىكتەۋدەن تىس قاتىسۋعا مۇمكىندىگى بار ەدى. الايدا، ءوز ەركىمەن جارىسقا قاتىسۋدان باس تارتىپ وتىر.
- «قازاقستان بارىسى» تۋرنيرىنەن كەيىن «الەم بارىسى» حالىقارالىق تۋرنيرى وتەتىنىن بىلەمىز. مۇمكىن بەيبىت سول دوداعا دايىندالىپ جاتقان بولار...
- وعان بەيبىتتىڭ قاتىسۋ-قاتىسپاۋىن باپكەرلەر كەڭەسى انىقتايدى. ونى بەيبىت ءوزى شەشپەيدى.
- اڭگىمەڭىزگە راحمەت!
اۆتور: كۇنسۇلتان وتارباي
