جاقىپ اسانوۆ ءوزى باسقارىپ وتىرعان پروكۋراتۋرانىڭ باستى كەمشىلىكتەرىن جايىپ سالدى
«ءبىزدىڭ زاڭدارىمىزدا پروكۋراتۋرانىڭ ناقتى قۇزىرەتى ايقىندالماعان، ياعني جۇمىس اۋقىمى مەن ونىڭ شەگى ناقتىلانباعان. كەز كەلگەن سالانىڭ ءوزىنىڭ ءتارتىبى بار جانە ولار سوعان تاۋەلدى. ءاربىر مينيسترلىكتىڭ، مەملەكەتتىڭ ورگاننىڭ جاۋاپتى سالاسى بار، ءوزىنىڭ باعىتىندا زاڭدىلىقتى قامتاماسىز ەتەدى. ال پروكۋراتۋرا بولسا، سولاردى قايتالايمىن دەپ، جاعالاسىپ، ولاردىڭ جۇمىسىنا ارالاسا بەرەمىز. كىمدى تەكسەرەمىز دەسەك تە، ءوز ەركىمىز. شىنىن ايتساق، ءبىز ارالاسپايتىن جەر قالمادى. وسىنىڭ كەسىرىنەن حالقىمىزدىڭ جانىنا باتىپ، كوڭىلىنە ءتيىپ جۇرگەن ماسەلەلەردى شەتكەرى قالدىردىق. نەگە؟ ويتكەنى ۋاقىتىمىز جوق دەيمىز، بىزدە جالپى قاداعالاۋ بار، ياعني بيزنەستى جانە مەملەكەتتىك ورگانداردى تەكسەرۋىمىز كەرەك دەپ سولاي قاراي اۋىپ كەتكەنبىز. ال قىلمىستىق پروتسەسس ءوز بەتىنشە قالدى»، - دەپ توقتالدى باس پروكۋرور «پروكۋراتۋرا تۋرالى» زاڭ جوباسىن تانىستىرۋ بارىسىندا.
وسى ورايدا ول ەلىمىزدە 60 قا جۋىق باقىلاۋشى ءارى تەكسەرۋ ورگاندار ەكەنىن، دەگەنمەن ولاردىڭ جۇمىسىن دا پروكۋراتورا وزىنە ءىلىپ العانىن سىنعا الدى.
«بۇل ورگاندار دا بۇل ۇردىسكە ۇيرەنىپ كەتتى. ولار قيت ەتسە بولدى جاۋاپكەرشىلىكتەن قاشىپ، پروكۋراتۋراعا بارىڭىز دەيدى. پروكۋراتۋراعا دا بۇل ىڭعايلى، ياعني قالاسا تەكسەرەدى نەمەسە باسقالارعا ىسىرا سالادى. مۇنىڭ بارلىعى جەمقورلىققا اپاراتىن تۋرا جول. جالپى، كەز كەلگەن پروبلەمانى شەشەتىن، بۇكىل ارىزداردى قارايتىن ءبىر امبەباپ ورگان بولۋ مۇمكىن ەمەس. مۇنداي ەشبىر ەلدە دە جوق. ءبىز بولساق قاداعالاۋشى ورگانبىز دەپ بارلىعىن ۇيرەتىپ الدىق، ءبىراق قاتىسى بار ما، جوق پا وعان قارامادىق»، - دەدى اسانوۆ.
ونىڭ سوزىنە قاراعاندا، بىلتىردىڭ وزىندە پروكۋراتۋراعا 350 مىڭ ارىز تۇسكەن، وسى ورايدا بۇنىڭ بارلىعىن قامتۋدا ءتيىستى ساپا بولمايدى.
ايتا كەتەيىك، اتالعان زاڭ جوباسىندا جوعارى قاداعالاۋدىڭ شەكتەرى مەن نىساندارى ايقىندالعان، ونىڭ نەگىزگى باعىتتارى ناقتىلانعان، مەملەكەتتىك ورگاندار مەن كاسىپكەرلىك سۋبەكتىلەر قىزمەتىنىڭ زاڭدىلىعىن ساقتاۋ ءۇشىن جوعارى قاداعالاۋدىڭ شەكارالارى بەلگىلەندى.
اۆتور: رۋسلان عابباسوۆ
