الماتىدا اشارشىلىق قۇرباندارىنا ارنالعان ەسكەرتكىش اشىلدى - فوتو
«اشىلعالى وتىرعان ەسكەرتكىش وسكەلەڭ ۇرپاقتىڭ، جازىقسىز شەيىت بولعان اتا-بابامىزدىڭ رۋحىنا باس ءيىپ، تاۋەلسىزدىگىمىزدىڭ باعا جەتپەس بايلىق ەكەندىگىن ۇعىندىرا بىلەتىن كيەلى ورىن بولارى ءسوزسىز. ەلباسىنىڭ تاپسىرماسىمەن وتكەن جىلى وسى ەسكەرتكىشتى سالۋعا بايقاۋ جاريالاعان ەدىك. وعان جالپى سانى 21 جوبا ارنايى مامانداردىڭ تالقىلاۋىنان ءوتتى. استاناداعى مەملەكەتتىك كوميسسيانىڭ ۇيعارۋىمەن بالاسىن كەۋدەسىنە قىسقان انا بەينەسى جەڭىمپاز دەپ تانىلدى. انا - بار تىرشىلىكتىڭ قاينار كوزى، كەلەشەك كەپىلى. انا قاسىرەتى - ەل قاسىرەتى. اشتىقتان بۇراتىلعان بولاشاعىن، ءسابيىن قۇشاقتاعان انا حالى سول زامانداعى ءومىر مەن ءولىم اراسىنداعى قازاق حالقىنىڭ باسىنان كەشكەن تاعدىرىن شىنايى بەينەلەيتىندەي»، - دەدى باۋىرجان بايبەك.
قولا مەن گرانيتتەن جاسالعان بيىكتىگى ءۇش مەتر ەسكەرتكىش اۆتورلارى قانات بيگۋليەۆ، ايدوس بۇركىتبايەۆ، دۋلات ۇسەمبايەۆ.
ايتا كەتۋ كەرەك، بۇدان شيرەك عاسىر بۇرىن وسى جەرگە «1931-33-جىلدارداعى اشارشىلىق قۇرباندارىنا ەسكەرتكىش ورناتىلادى» دەگەن بەلگىتاس قويىلعان بولاتىن.
ەستەرىڭىزگە سالا كەتەيىك، گولوشەكيننىڭ كۇشتەپ ۇجىمداستىرۋ ساياساتىنىڭ سالدارىنان 1931-33-جىلدارى قازاق دالاسىن اشتىق جايلادى. 1931-1933-جىلدارى بۇكىل قازاقستان بويىنشا اشتىقتان 6,2 ميلليون حالىقتىڭ 2,1 ميلليونى قىرىلدى.
اۆتور: گۇلميرا عوسمانالي
