نۇرسۇلتان نازاربايەۆ «الجير» مۋزەيىندە ساياسي قۋعىن-سۇرگىن قۇرباندارىنا تاعزىم ەتتى - فوتو
«31- مامىردا ءبىز ساياسي-قۋعىن سۇرگىن قۇرباندارىن ەسكە الامىز. رەپرەسسيا بارلىق ك س ر و اۋماعىندا ءوتتى. قازاقستانعا كەلەتىن بولساق، مۇندا 103 مىڭ ادام سوتتالىپ، 25 مىڭى اتىلدى. قازاق زيالىلارىنىڭ قايماعى، ەل باسشىلارى ءتۇپ-تامىرىمەن جويىلدى. ولار بارشا قازاقستان بويىنشا سالىنعان 11 لاگەردىڭ قابىرعاسىندا اۋىر ازاپتاردان كوز جۇمدى. وندا ميلليوننان استام ادام تۇتقىندا بولدى. ك س ر و اۋماعىنان 1,5 ميلليوننان استام ادام سولتۇستىك كاۆكازدان، كورەيادان، بالتىق ەلدەرىنەن، ۋكراينادان، رەسەيدەن قازاقستانعا جەر اۋدارىلدى. وسىلايشا، ءبىز كوپ ۇلتتى ەلگە اينالدىق. ولاردىڭ بارلىعىنا قازاقستان تۋعان ۇيگە اينالدى، قازاقتار قۇشاق جايا قارسى الدى. سودان بەرى باسىمىز بىرلىكتە، تاتۋلىقتا قوسىلعان ءبىر حالىققا اينالدىق. سوندىقتان بۇل وقيعانى حالقىمىز ءاردايىم جادىندا ۇستاۋى ءتيىس»، - دەدى پرەزيدەنت.
ايتا كەتەيىك، 1997-جىلدان بەرى جىل سايىن 31- مامىر قازاقستاندا ەلباسى نۇرسۇلتان نازاربايەۆتىڭ جارلىعىمەن بەكىتىلگەن ساياسي قۋعىن-سۇرگىن قۇرباندارىن ەسكە الۋ كۇنى اتالىپ كەلەدى.
ⅩⅩ عاسىرداعى ساياسي قۋعىن-سۇرگىن - مىڭداعان جازىقسىز ادامداردىڭ قانى مەن كوز جاسىنا سۋارىلعان تاريحىمىزدىڭ شەرلى بەتتەرىنىڭ ءبىرى ەكەندىگى شىندىق. ويتكەنى، اكىمشىلىك-جازالاۋشى جۇيە ەڭبەكتەگەن ءسابيدى دە، ەڭكەيگەن كارىنى دە، بولمىسى نازىك ايەلدى دە اياعان جوق.
ال سول ءبىر قاسىرەتتى جىلداردى ەستە ساقتاۋ بۇگىنگى جانە كەلەر ۇرپاقتىڭ پارىزى ەكەندىگى ءسوزسىز.
ەسكە سالا كەتسەك، ساياسي قۋعىن-سۇرگىن جانە توتاليتاريزم قۇرباندارىنىڭ «الجير» مەموريالدى-مۇراجاي كەشەنى ق ر پرەزيدەنتى ن. ءا. نازاربايەۆتىڭ باستاماسىمەن 2007-جىلعى 31- مامىردا اقمول اۋىلىندا «وتانىن ساتقاندار» ايەلدەرىنىڭ بۇرىنعى اقمولا لاگەرىنىڭ ورنىندا اشىلدى.
بۇگىندە ايتۋلى مەموريالدىق كەشەن «قايعى قاقپاسى» مونۋمەنتى، «كۇرەس پەن ءۇمىت» جانە «اشىنۋ مەن دارمەنسىزدىك» سەكىلدى ەكى مۇسىندىك كومپوزيتسيادان، سونداي-اق «ەسكە الۋ قابىرعاسىنان» قۇرالعان.
مۇراجايدىڭ ەكسپوزيتسيالارى ءوزىنىڭ ماتەريالدىق قۇجاتتارىمەن ساياسي قۋعىن-سۇرگىن تاريحىن، جازالاۋ ينستيتۋتتارىنىڭ ارەكەت ەتۋ تەتىكتەرىن كورسەتەدى.
اۆتور: جاسۇلان جولدىبايەۆ
