سەمەيدە ءاليحان بوكەيحانوۆقا قولادان ۇلكەن ەسكەرتكىش قويىلادى

استانا. قازاقپارات - بيىل سەمەيدە ءاليحان بوكەيحانوۆقا قولادان ۇلكەن ەسكەرتكىش قويىلادى.

بۇل تۋرالى بۇگىن Sarap Time ساراپشىلار كلۋبىنىڭ «تاريحي سانا جانە قوعامنىڭ رۋحاني قاۋىپسىزدىگى» تاقىرىبىنداعى وتىرىسىندا «ساكرالدى قازاقستان» عىلىمي-زەرتتەۋ ورتالىعىنىڭ باسشىسى بەرىك ءابدىعالي ۇلى ءمالىم ەتتى، دەپ حابارلايدى قازاقپارات.

«الاشتىڭ 100 جىلدىعىنا وراي ۇكىمەت ءوز ءىس-شارالارىن دايىنداپ جاتقان شىعار. ءبىراق ءاربىر عالىم، ءاربىر ءوڭىر بۇل ىسكە ءوز ۇلەسىن قوسۋدا. بيىل قۇداي قالاسا سەمەيدە، قىركۇيەك ايىندا ءاليحان بوكەيحانوۆقا قازاقستانداعى العاشقى بولىپ قولادان ۇلكەن ەسكەرتكىش قويىلعالى جاتىر. ءاربىر ايماقتا كونفەرەنسيالار وتۋدە»، - دەپ اتاپ ءوتتى ول.

سونىمەن قاتار الاش اسكەرىنە قاتىستى دەرەكتەردى 4 جىل بويى رەسەي ارحيۆتەرىنەن ىزدەپ تاۋىپ، جارىققا شىعارىپ جاتقاندىقتارىنا توقتالدى.

«حالىقتىڭ كوبى بىلە بەرمەيدى. الاش اسكەرى العاشقى كۇنىنەن باستاپ اقتاردىڭ قاتارىندا بولدى. باتىستا دا، قوستاناي، تورعاي وڭىرىندە دە جانە شىعىس قازاقستاندا دا اقتاردىڭ قۇرامىندا ەدى. قوستاناي وڭىرىندە ەكى پولك، تورعاي پولكىن قوسقاندا ءۇش پولك، شىعىس قازاقستان مەن جەتىسۋدا 6 پولك قۇرىلعان. ولار كازاك ۇلگىسىندە 400-500 ادامدىق بولعان. جالپى الاشوردا 2,5 مىڭداي اسكەر جاساقتاعان»، - دەدى بەرىك ءابدىعالي ۇلى.

اۆتور: مارلان جيەمباي