ميلليون تەڭگەنىڭ تۇسكى اسى: الماتىداعى ەڭ قىمبات مەيرامحاناعا كىمدەر كەلەدى؟
ءتىپتى، كەيبىر تاماقتانۋ ورتالىقتارى جىلىنا 2 تريلليون دوللارعا دەيىن قارجى تابادى ەكەن. قىمبات مەيرامحاناعا بارعان بايلار دا اقشام جەلگە كەتتى دەپ ەسەپتەمەيدى. كەرىسىنشە اقىسىنا تۇرارلىق دەمالىس وتكىزدىم دەپ سانايدى ەكەن. سەبەبى، ەليتانىڭ اتى - ەليتا.
NUR. KZ پورتالى الماتىداعى ەڭ قىمبات، ءارى بەدەلدى سانالاتىن مەيرامحانانىڭ ءسان سالتاناتىنا توقتالعان ەدى.
مەيرامحانا ءال-فارابي داڭعىلىنىڭ بويىندا ورنالاسقان. بۇل اۋداننىڭ ءوزى - باي-باعلانداردىڭ مەكەنى.
500 ادامعا ارنالعان ءدامحانانىڭ باستى ەرەكشەلىگى - يتالياندىق اس دايىندالادى.
ازىق-تۇلىك اپتا سايىن ۇشاقپەن كەلەدى
قىزمەتكەرلەردىڭ سوزىنشە، مەيرامحاناداعى ەڭ سۇرانىستاعى اس - امەريكالىق ستەيك. ونىڭ 100 گرامى - 6000 تەڭگە، ال تويىپ جەۋ ءۇشىن جارتى كەلى تاپسىرىس بەرۋ كەرەك.
ەكىنشى ورىندا - تۇزعا پىسكەن جابايى سيباس بالىعى. ءبۇتىن ءبىر بالىقتىڭ قۇنى ورتا ەسەپپەن 50 مىڭ تەڭگەگە جاقىن.
تاماقتىڭ مۇنداي قىمبات بولۋىنىڭ سەبەبى - بارلىق ازىق-تۇلىك فرانسيا، يتاليادان اپتا سايىن ارنايى ۇشاقپەن كەلەدى ەكەن.
ءتىپتى مەيرامحاناداعى قارا سۋدىڭ ءوزى ەۋروپادان جەتكىزىلگەن. سۋدىڭ 0,7 ليترى - 2500 تەڭگە.
اكىمشىلەردىڭ سوزىنە سۇيەنسەك، اشىلعانىنا 5 جىل بولعان ءدامحانادان اس ىشۋگە كەلگەن قالتالى قوناقتاردا شەك جوق. ءتىپتى، ون شاقتى ەلدىڭ پرەزيدەنتتەرى كەلىپ تۇستەنگەن. ەڭ سوڭعىسى كورشى قىرعىز ەلىنىڭ پرەزيدەنتى - المازبەك اتامبايەۆ.
«بىزدە قوناقتار ءار ءتۇرلى. ءبىرى - پيتسا جەپ، شاي ءىشىپ 30 مىڭ تەڭگە تولەسە، ەندى ءبىرى - 1,5 ميلليون تەڭگەگە تۇستەنۋى مۇمكىن. بۇل سومانىڭ ىشىندە 700 مىڭدىق شاراپقا تاپسىرىس بەرگەندەرى دە بار.
ەلدە داعدارىس دەپ جاتادى. ءبىز ءۇشىن ول ايتارلىقتاي سەزىلمەيدى. بۇرىن دا قوناق كوپ بولعان، قازىر كوبەيمەسە ازايمادى»، - دەيدى رەستوران اكىمشىسى.
مەيرامحاناداعى قىمبات تاپسىرىس - الكوگول
تومەندەگى ۆيسكيدىڭ قۇنى - 2500000 تەڭگە. ىشىمدىكتەردىڭ ءوزى جەرتولەدە ساقتالعان. ارنايى ماماننىڭ كەڭەسىنە جۇگىنە وتىرىپ، قالتاڭىز كوتەرگەن الەمدىك شاراپتىڭ ءتۇر-تۇرىنە تاپسىرىس بەرە الاسىز.
مەيرامحانادا 100 دەن استام قىزمەتشى بار. ولاردىڭ باس اسپازىنان باستاپ ەسىك كۇزەتشىسىنە دەيىن جىل سايىن ءبىلىمىن جەتىلدىرىپ، وقىپ تۇرادى.
- بىزدە جۇمىس ىستەگىسى كەلەتىن جاستار وتە كوپ. ماسەلەن، بارلىعى داياشى بولعىسى كەلەدى. ول وڭاي ەمەس. بىرىنشىدەن، بىزدەگى داياشىلار ءۇش تىلدە (قازاق، ورىس، اعىلشىن تىلدەرى) ەركىن سويلەيدى. سوسىن قىزمەتىنە كىرىسپەس بۇرىن 3-6 اي ارنايى وقىتىپ، قوناق كۇتۋگە دايىندايمىز. داياشىلار وتە جاقسى تابىس تابادى. باي قوناقتار وتە قوماقتى شايپۇل تاستايدى، - دەيدى قىزمەتكەر.
- قانشالىقتى كوپ؟
- ايتا المايمىن.
- 1000 دوللار شايپۇل الاتىندارى بار ما؟
- ودان دا كوپ بولۋى مۇمكىن.
مەيرامحاناعا كىرگەن ادام ءوزىنىڭ الماتىدا جۇرگەنىن ۇمىتىپ كەتەدى. مۇندا بارلىعى شەتەلدىك ۇلگىدە. قۇددى ءبىر يتاليا ەلىنە ساياحات جاساعانداي بولاسىز.
الايدا، قوناق كۇتۋگە كەلگەن قازاقتار ءۇشىن يتاليالىق ستەيك ەمەس، قازاقتىڭ ەتى ءبىرىنشى ورىندا.
«بىزدە ۇيلەنۋ تويلارى كوپ بولادى. اس ءۇي يتاليالىق بولسا دا، ىستىق تاماق رەتىندە تەك ەتكە تاپسىرىس بەرەدى. قازى-قارتا مىندەتتى تۇردە بانكەتتىك مازىردە بار. بۇل ەكى اسسىز توي وتپەيدى دەسەك بولادى.
تاعى ءبىر ايتارى، الماتىداعى ەڭ ءدامدى بەشبارماق ءبىزدىڭ اسحانادا دايىندالادى. سەبەبى، باسقا مەيرامحانادا توي جاساپ، قوناق كۇتسە دە بەشبارماقتى بىزگە سەنىپ تاپسىرادى»، - دەيدى مەيرامحانا ديرەكتورى.
جاقسىلاپ دەمالۋ قۇنى - 16 ميلليون تەڭگە
مەيرامحاناعا بايلار تەك تاماق ءىشۋ ءۇشىن عانا ەمەس، ماڭىزدى ماسەلە شەشۋ ءۇشىن دە باس سۇعادى. ياعني، مييللونداعان تابىستى بيزنەستەردىڭ كەلىسىم-شارتتارى دا وسى مەيرامحانانىڭ ىشىندە بەكتىلىپ جاتادى.
جاقسىلاپ دەمالعىسى كەلگەن ازاماتتاردىڭ مەيرامحانانى 1 كۇنگە تولىق ساتىپ الۋىنا بولادى. ونىڭ قۇنى - 16 ميلليون تەڭگە. بۇل سوماعا ىشەتىن اسىڭىز، جاندى داۋىستاعى مۋزىكا جانە جوعارعى دەڭگەيدەگى قىزمەت كىرەدى.
قوناقتاردىڭ الدىنا قويىلاتىن گۇلدەر دە كۇن سايىن نيدەرلاندىدان اكەلىنەدى. ايتا كەتەرلىگى، مەيرامحاناعا ەلدىڭ بارلىعى ميلليوندىق شاراپ ىشۋگە عانا كەلمەيدى. ءبىر شىنى شاي ءىشىپ كەتەتىندەر دە بار ەكەن.
