ەلباسى مىرزاتاي جولداسبەكوۆتى «بارىس» وردەنىمەن ماراپاتتادى

استانا. قازاقپارات - ق ر پرەزيدەنتى نۇرسۇلتان نازاربايەۆ مەملەكەت جانە قوعام قايراتكەرى، كورنەكتى عالىم مىرزاتاي جولداسبەكوۆتى قابىلدادى، دەپ حابارلايدى اقوردانىڭ باسپا ءسوز قىزمەتى.

مەملەكەت باسشىسى كەزدەسۋدە م. جولداسبەكوۆتى 80 جاسقا تولعان مەرەيتويىمەن قۇتتىقتاپ، وعان زور دەنساۋلىق، ۇزاق عۇمىر تىلەدى.

- تاۋەلسىزدىكتىڭ العاشقى تاڭىنان باستاپ ءسىز ءاردايىم مەنىڭ جانىمدا بولدىڭىز. ماعان قولداۋ ءبىلدىرىپ، كەڭەسشىم، پرەمەر-ءمينيستردىڭ ورىنباسارى بولىپ قىزمەت اتقاردىڭىز. مەن ءسىزدى جاۋاپتى لاۋازىمدارعا تاعايىندادىم. ەلشى، ۋنيۆەرسيتەت رەكتورى بولدىڭىز، ديپلوماتتاردى تاربيەلەۋگە اتسالىستىڭىز. بەلگىلى عالىم، قالامگەر رەتىندە كەڭ تانىلدىڭىز، - دەدى قازاقستان پرەزيدەنتى.

سونداي-اق، نۇرسۇلتان نازاربايەۆ كەزدەسۋدە م. جولداسبەكوۆتىڭ ەل الدىنداعى ەڭبەگىن ەسكەرىپ، قوعام قايراتكەرىن 1- دارەجەلى «بارىس» وردەنىمەن ماراپاتتادى. م. جولداسبەكوۆ ءوز قىزمەتىنىڭ ناتيجەلەرىن جوعارى باعالاعانى ءۇشىن مەملەكەت باسشىسىنا العىس ايتتى.

- مەن تاۋەلسىزدىگىمىزدىڭ قالىپتاسۋىنداعى بارلىق پروتسەستىڭ كۋاگەرى بولدىم. جاقسىلىق تا، قيىندىق تا، تارشىلىق تا باستان ءوتتى. باقىتىمىزعا وراي، قازىر ەگەمەندىكتىڭ ارقاسىندا جاقسى ءومىر ءسۇرىپ جاتىرمىز. ەل ىشىندە رەفورمالار جۇرگىزىلۋدە، ءبارىمىز كۇتكەن رۋحاني جاڭعىرۋ باستالدى. مەن قاشان دا ءسىزدىڭ قاسىڭىزدا، سەنىمدى سەرىگىڭىز بولىپ قالا بەرەمىن، - دەدى قوعام قايراتكەرى.