قىتاي كومپانياسى اقمولا وبلىسىندا سابان وڭدەيتىن زاۋىت سالماق

كوكشەتاۋ. قازاقپارات - قىتايلىق كومپانيا اقمولا وبلىسىندا ءىرى ينۆەستيتسيالىق جوبانى جۇزەگە اسىرۋعا نيەتتى.

بۇل تۋرالى قىتايدىڭ  «Anhui Geyi Biorefineries Industrial Park Limited»ونەركاسىپتىك كومپانياسى وكىلدەرىنىڭ ەسىل اۋدانىنا جۇمىس ساپارى بارىسىندا ايتىلدى، دەپ حابارلايدى «قازاقپارات» ح ا ا ءتىلشىسى وڭىرلىك كوممۋنيكاتسيالار قىزمەتىنە سىلتەمە جاساپ.

ەسىل اۋدانى اكىمى باسپا ءسوز قىزمەتىنىڭ مالىمەتى بويىنشا قىتايلىق ينۆەستور اۋدان اۋماعىن بيولوگيالىق ماسسانى جانە ونىڭ ىشىندە جىلىنا 500 مىڭ توننا كولەمىندە بيداي سابانىن وڭدەيتىن ءىرى كاسىپورىن سالۋعا الەۋەتى زور دەپ وتىر. وسى ماقساتتا قىتايلىقتار 300 ميلليون تەڭگە قارجى سالۋعا ءازىر. وعان قوسا ينۆەستيتسيالىق شىعىندى تولىقتاي موينىنا الماق. كاسىپورىننىڭ ىسكە قوسىلۋى 500 دەن استام جاڭا جۇمىس ورنىن اشۋعا مۇمكىندىك بەرمەك. كاسىپورىننىڭ جوبالىق قۋاتى جىلىنا 10 ميلليون تونناعا جۋىق قاتتى جانە سۇيىق كۇيدەگى ورگانيكالىق تىڭايتقىشتاردى وندىرۋگە جەتەدى.

وعان قوسا، زاۋىتتا 120 ميلليون كۆت ەلەكتر قۋاتىن الاتىن 5 مىڭ تەكشە مەتر مەتان، ەۋروپا جانە قىتاي ەلىنە ەكسپورتقا شىعارۋعا بولاتىن 70 توننا بيوحيميالىق ليگنينا (مەديتسينا جانە ءوندىرىس سالاسىندا قولدانىلاتىن باعالى حيميالىق شيكىزات)، سونداي- اق، 20 مىڭ توننا جوعارى ساپالى قاعاز نەمەسە 200 توننا كارتون قاعازبەن قامتاماسىز ەتۋ ءۇشىن قاجەتتى سەلليۋلوزا وندىرۋگە بولادى. جوبانىڭ ارتىقشىلىعى ول اۋىل شارۋاشىلىعى شيكىزاتىن ەكولوگيالىق تازا جولمەن قايتا وڭدەپ، ەكولوگيالىق تازا ەلەكتر ەنەرگياسىن الۋ. جۇمىس ساپارى بارىسىندا قىتايلىق دەلەگاتسيا ەسىل قالاسىنداعى ءوندىرىس ورىندارىن ارالاپ كورىپ، وزدەرىنىڭ ينۆەستيتسيالىق جوبالارىن جۇزەگە اسىراتىن اۋدان ورتالىعىنىڭ ينفراقۇرىلىممەن قامتاماسىز ەتىلۋى، لوگيستيكالىق دامۋىنا كوڭىلدەرى تولدى.

 اۆتور: اسلان وسپانوۆ