مولدوۆا رەسەيدىڭ بەس ديپلوماتىن ەلدەن شىعاردى

استانا. قازاقپارات- رەسەيدىڭ مولدوۆاداعى ەلشىسى فاريت مۋحامەتشيننىڭ سوزىنە قاراعاندا، مولدوۆا بيلىگى رەسەي ديپلوماتيالىق وكىلدىگىنىڭ بەس قىزمەتكەرىن ەلدەن شىعارعان.

مولدوۆانىڭ رەسەيشىل پرەزيدەنتى يگور دودون ەۋروپاشىل ساياساتتى ۇستاناتىن ۇكىمەتتىڭ بۇل ارەكەتىن ايىپتادى. دودون Facebook-تەگى پاراقشاسىندا «ۇكىمەت رەسەيگە قاتىستى ەرسى ارەكەت جاسادى» دەپ جازدى.

مولدوۆا ۇكىمەتى ەۋروپا وداعى مەن ناتو- عا قوسىلۋعا بەيىل. دودون ۇكىمەتتىڭ بۇل جوسپارىنا قارسى جانە ماسكەۋمەن تىعىز بايلانىس ورناتۋدان ۇمىتتەنەدى. مولدوۆادان 1990 -جىلى بولىنگەن پريدنەستروۆە ايماعى رەسەي مەن مولدوۆا اراسىندا ۇزاق جىلدار بويعى ەگەسكە سەبەپ بولىپ كەلەدى. 1992 -جىلى ەكى جاق اراسىندا قىسقا ۋاقىتتىق اسكەري جانجال شىعىپ، ول رەسەيدىڭ پريدنەستروۆە جاعىنا بولىسىپ، اسكەري كيلىگۋىمەن اياقتالعان. پريدنەستروۆەنىڭ تاۋەلسىزدىگىن الەمىڭ ءبىر دە ءبىر ەلى مويىنداعان جوق.

www.azattyq.org