قازاقستاندىق عالىمدار ازەربايجاندا بابالار ءىزىن زەردەلەۋدە
بۇل تۋرالى ءا ر- داعى «قازاقپارات» ح ا ا ءتىلشىسى حابارلادى.
عىلىمي ەكسپەديتسيانىڭ ماقساتى - الەمدەگى قازاقتار مەن تۇركىلەردىڭ كوشى-قون ىزدەرىن زەردەلەۋ، سونداي-اق عۇن، تۇركى، قىپشاقتار ۇرپاقتارىمەن تانىسۋ.
ەكسپەديتسيانى ساعادات نۇرماعامبەتوۆ اتىنداعى حالىقارالىق قوعامدىق-قايىرىمدىلىق قورى ۇيىمداستىردى.
ەكسپەديتسيا قۇرامىندا عىلىم دوكتورلارى وردەنبەك مازبايەۆ پەن جاقسىلىق ءسابيتوۆ بار.
«قازاقستان مەن ازەربايجان حالقى ۇلى تۇركىلەردىڭ تىكەلەي ۇرپاقتارى بولىپ تابىلادى. ءبىزدىڭ قازىرگى مەملەكەتتەرىمىزدىڭ اۋماعىنا قونىستانعان قىپشاقتار مەن وعىز تايپالارى ءبىزدىڭ حالىق تاريحىندا، ساۋلەتىندە، مادەنيەتى مەن ونەرىندە وشپەس ءىز قالدىردى. تۇركى ءىزى قازاقستان جانە ازەربايجانمەن شەكتەلمەيدى، ولار شىعىس جانە باتىس ەۋروپانى قوسقاندا، ورتالىق ازيا مەن كاۆكازدان تىس جەرلەرگە جايىلعان. بىرنەشە عاسىرلار بۇرىن ازەربايجاندا قالعان ءبىزدىڭ اتا-بابالارىمىزدىڭ ەسكەرتكىشتەرىن زەردەلەۋ ماقساتىندا قازاقستاندىق عىلىمي ەكسپەديتسيا باكۋ مەن گازاعا بارادى. سودان كەيىن بابالارىمىز ءبىر زاماندا تۇرعان نەمەسە تۇركى تايپالارى كەسىپ وتكەن ءبىرقاتار ەلدەردى ارالايدى»، - دەدى شارادا ءسوز سويلەگەن ازەربايجانداعى قازاقستان ەلشىسى بەيبىت يسابايەۆ.
ديپلومات قازاقستاننىڭ اتا-بابالارىنىڭ داستۇرىنە، ءوز تاريحىنا، قازاق حالقىنىڭ رۋحاني جاڭعىرۋىنا ەرەكشە ءمان بەرەتىنىن اتاپ ءوتتى جانە «قازاقستاننىڭ كيەلى جەرلەرىنىڭ گەوگرافياسى»، «تۋعان جەر» جوبالارى جايىندا ايتتى.
قازاقستان مەن رەسەيدەن كەيىن ەكسپەديتسيا مارشرۋتىندا ازەربايجان ءۇشىنشى ەل بولدى. حالىقارالىق تۇرىك مادەنيەتى مەن مۇراسى قورىنىڭ پرەزيدەنتى گيۋناي ەفەنديەۆا ءبىزدىڭ ەلدە ورتاق نارسە كوپ ەكەنىن ايتتى، ول - ءتىل، ءدىن، ءداستۇر جانە بۇل ورتاق نارسەلەردى كورسەتۋ قاجەت.
«ءبىزدىڭ بابالارىمىزدىڭ ىزدەرى شىعىستا ءۇندىستانعا دەيىن جەتەدى. دەلي سۇلتاناتتىعىن قىپشاقتار قۇرعان. تۋريستەرگە بۇگىندە ۇندىستەر كورسەتىپ جاتقان كورىكتى جەرلەردى ءبىزدىڭ بابالارىمىز تۇرعىزعان»، - دەدى ەكسپەديتسيا جەتەكشىسى. ازەربايجاننان كەيىن ەكسپەديتسيا ارمەنيا، گرۋزيا، ۋكراينا، سلوۆەنيا، پولشا، ۆەنگريا، گەرمانيا، يتاليا، ۆاتيكانعا بارىپ، ميسسيانى فرانسيادا اياقتايدى.
ەكسپەديتسيا قورىتىندىسى بويىنشا عىلىمي بايانداما جاريالانادى.
