استانانىڭ ىرگەسىندەگى «التىن تاعا» بازارىندا ساپالى ءارى ەكولوگيالىق تازا ءونىم ساتىلادى
دەپ حابارلايدى «قازاقپارات» ح ا ا ءتىلشىسى وبلىستىق ىشكى ساياسات باسقارماسىنىڭ باسپا ءسوز قىزمەتىنە سىلتەمە جاساپ.
استانانىڭ ىرگەسىندەگى قوسشى اۋىلىنىڭ ماڭىندا ورنالاسقان «التىن تاعا» ساۋدا كەشەنىنىڭ اۋماعى 1650 شارشى مەتردى قۇرايدى. وندا تەك ساۋدا پاۆيلوندارى عانا ەمەس، ۆەتەرينارلىق زەرتحانا، قاساپحانا، شۇجىق سەحى، توڭازىتقىش كامەراسى، كوكونىس جانە جەمىس- جيدەك قويماسى بار. وعان قوسا، 2500 قوي- ەشكى، 300 باس ءىرى قارا مەن جىلقى تۇلىگىن قاماپ ۇستايتىن 15 اشىق مال قوراسى دا قاراستىرىلعان.
ساۋدا كەشەنىنىڭ وكىلدەرىنىڭ ايتۋىنشا، مۇنداي بازار ەلىمىزدە تەك جامبىل وبلىسىنىڭ قورداي كەنتىندە عانا بار. «التىن تاعا» بازارىندا كوكونىس، جەمىس- جيدەك، ەت جانە ەت ونىمدەرى، بالىق، ءسۇت جانە ءسۇت ونىمدەرى، ارپا، تۇرمىستىق حيميا جانە كۇندەلىكتى تۇتىناتىن تاۋارلار ساتىلادى.
شۇجىق سەحىندا ەت ونىمدەرىنىڭ سۇرلەنگەن، جارتىلاي سۇرلەنگەن ءتارىزدى 50 ءتۇرى شىعارىلادى. سەحتىڭ قۋاتى تاۋلىگىنە 2 توننا ەت ونىمدەرىن قۇرايدى. سونداي- اق، كوكونىس جانە جەمىس- جيدەك قويماسىندا 1000 توننا ءونىم ساقتاۋعا بولادى. قويمانىڭ ءىشى سالقىنداتقىش، بەلگىلى ءبىر اۋا تەمپەراتۋراسىن ۇستاپ تۇرۋ ءۇشىن قاجەتتى قوندىرعىلارمەن جابدىقتالعان.
وعان قوسا، ساۋدا ورنىندا سىرتتان كەلگەن ساۋداگەرلەر ءۇشىن جاتاقحانا، 100 ورىندىق اسحانا جانە 200 كولىككە ارنالعان اۆتوتۇراق قاراستىرىلعان. «التىن تاعا» بازارى تاس جولدىڭ بويىندا ورنالاسقاندىقتان ءارى بەينەباقىلاۋ كامەراسىمەن جابدىقتالعاندىقتان اۋىل شاۋاشىلىعى تاۋارلارىن ونىدىرۋشىلەر ءۇشىن وتە قولايلى. وسى ساۋدا ورنى ارقىلى ەلوردا تۇرعىندارى مەن استانالىق ەلدى مەكەندەردەگى حالىق ساپالى ءارى ەكولوگيالىق تازا اۋىل شارۋاشىلىعى ونىمدەرىن تۇتىنۋدا.
اۆتور: اسلان وسپانوۆ
