قازاقستاندا ادۆوكاتتار اقىسىز قىزمەت كورسەتۋگە مىندەتتەلەدى

استانا. قازاقپارات - ق ر ادىلەت ءمينيسترى مارات بەكەتايەۆ ادۆوكاتتاردىڭ جىلىنا بەلگىلى ءبىر ساعاتتار كولەمىندە حالىققا تەگىن قىزمەت كورسەتۋىنە مىندەتتى بولاتىن جۇيەنى ەنگىزۋ ۇسىنىسىن جاسادى، دەپ حابارلايدى قازاقپارات.

«الەمدىك تاجىريبەگە سۇيەنسەك، قازاقستاندا ادۆوكاتۋرا ينستيتۋتىن دامىتۋ ءۇشىن «Probono» جۇيەسىن ەنگىزۋ قاجەت. ال ونى ەنگىزۋ ءۇشىن ادۆوكاتتاردى ازاماتتارعا زاڭگەرلىك كومەكتى جىلىنا ءتيىستى ساعاتتار كولەمىندە بيۋدجەتتىك وتەۋسىز كورسەتۋگە مىندەتتەۋ قاجەت. سونىمەن قاتار قورعاۋشى توقسان سايىن القاعا اتالعان كومەكتى كورسەتۋ بويىنشا ەسەبىن تانىستىرۋى ءتيىس»، - دەدى مينيستر ماجىلىستەگى ۇكىمەت ساعاتىندا.

 ونىڭ اتاپ وتۋىنشە، «Probono» جۇيەسى حالىقتىڭ الەۋمەتتىك ءالسىز توبىنا اقىسىز زاڭگەرلىك كومەكتى قامتاماسىز ەتۋ قادامىن ەسكەرەدى.

 «ازاماتتاردىڭ زاڭگەردى تاڭداۋ كەزىندە بۇل جۇيە ەڭ ماڭىزدى ولشەم بولىپ تابىلادى. «Probono» اياسىنداعى ساپالى جۇمىس زاڭگەرگە سەنىمدى ارتتىرادى جانە ول ءۇشىن تابىستىلىقتىڭ سالماقتى نىشانى بولىپ تابىلادى»، - دەيدى بەكەتايەۆ.

بۇدان بۇرىن حابارلانعانداي، مينيستر قازاقستاندا قورعاۋشىلار جەتىسپەيتىندىگىن جانە ولاردىڭ قىزمەتى قۇنى ازاماتتار ءۇشىن تىم قىمبات ەكەنىن ايتقان بولاتىن.

 اۆتور: رۋسلان عابباسوۆ