قازاقستاننىڭ تۇركياداعى ەلشىلىگى قازاق ءتىلدى باسىلىمنىڭ تارالۋىن ارتتىرۋدى كوزدەيدى
باسقوسۋعا «ياسساۋي» ءبىلىم جانە پاراسات قورى قازاق تۇرىكتەرى قوعامى مەن ءبىلىم جانە زەرتتەۋ ورتالىعىنىڭ ءتوراعالارى كاسىپكەرلەر مەن ابىز اقساقالدار قاتىستى. وتىرىستا قازاق- تۇرىك ىنتىماقتاستىعىن ارتتىرۋ جولدارى مەن اتاجۇرتتان الىستا جۇرگەن قانداستارىمىز اراسىندا قازاق ءتىلى مەن ۇلتتىق ءداستۇردى دارىپتەۋ جايى كەڭىنەن تالقىلاندى. تۇركيانىڭ ەڭ ءىرى قالاسى ىستامبۇلدا قازاق جانە تۇرىك تىلدەرىندە ءار توقسان سايىن «قازاق ەلى» جۋرنالى جارىق كورەدى.
باسىلىم جەرگىلىكتى وقىرماندارعا قازاقستاننىڭ ساياسي- ەكونوميكالىق، عىلىمي- الەۋمەتتىك سالاداعى وزەكتى اقپاراتتاردى تاراتىپ وتىر. سوندىقتان وسى كەلەلى كەزدەسۋدە جۋرنالدىڭ تيراجىن ارتتىرىپ، مازمۇنىن بايىتۋ جايىندا ءسوز بولدى. سونداي- اق ەلشى ابزال ساپاربەك ۇلى قازاقتىڭ اقىن- جازۋشىلارىنىڭ شىعارمالارىن تۇركيادا جان- جاقتى ناسيحاتتاۋ ءۇشىن اۋدارما ءىسىن مىقتاپ قولعا الىپ، وسى باعىتتا جۇيەلى ەڭبەك ەتۋدىڭ ماڭىزىنا توقتالدى. ءوز كەزەگىندە قانداستارىمىز 22- 25- ماۋسىم ارالىعىندا استانادا وتەتىن دۇنيەءجۇزى قازاقتارىنىڭ V قۇرىلتايىنا ۇلكەن دايىندىقپەن باراتىنىن جەتكىزدى.
سەركان دينچتۇرىك، قازاق تۇرىكتەرى ءبىلىم جانە زەرتتەۋ قوعامىنىڭ ءتوراعاسى:
- تۇركياداعى قازاقتار ەلشىمىزبەن سويلەستى. ولار قازاقستانعا قانداي كومەگىمىز تيەدى دەپ وتىر. ويتكەنى قازاق تۇرىكتەرى تۇركيادا جۋرنال، كىتاپتار شىعارىپ، جەرگىلىكتى جانە حالىقارالىق كونفەرەنسيالار وتكىزىپ كەلەدى. وسى جوبالاردى ەلشىمىزگە جەتكىزدىك.
فازىل توپلۋ، قازاق تۇرىكتەرى قوعامىنىڭ ءتوراعاسى:
- وسىنداعى قازاقتاردىڭ ءتىلىن، مادەنيەتىن ۇمىتپاۋ ءۇشىن دومبىرا دا شەرتىپ وتىرامىز. اسىرەسە جاستار ءبىلۋى ءتيىس. ەلشىمەن كەزدەسۋدە بارلىعىن ايتتىق. بىزدەرگە كومەك بەرىپ، بىرگە جۇمىس ىستەيىك دەپ وتىر. ءبىز سوعان ريزا بولدىق.
www.24.kz
