الماتىدا بۇرىنعى پوليتسەيلەر زەينەتكەرلەردى پاتەرى ءۇشىن اياۋسىز ءولتىرىپ وتىرعان

استانا. قازاقپارات - الماتىدا ىشكى ىستەر مينيسترلىگى قىلمىس سەركەلەرىنىڭ بىرىمەن قۇرىلعان قىلمىستىق توپتىڭ كوزىن جويدى.

ولار زەينەتكەرلەردى اياۋسىز ءولتىرىپ وتىرعان. بۇل تۋرالى NUR. KZ پورتالى ءى ءى د وكىلى الماس سادۋبايەۆقا سىلتەمە جاساپ حابارلايدى.

ونىڭ ايتۋىنشا، قىلمىستىق توپقا بارلىعى 20 ادام كىرگەن: نوتاريۋس وكىلدەرى، بۇرىنعى پوليتسەيلەر جانە وزگەلەر.

ولار جالعىز تۇراتىن زەينەتكەرلەردى ءولتىرىپ، پاتەرلەرىن يەمدەنىپ وتىرىپتى. قىلمىسكەرلەر پاتەردى زاڭسىز وزگەنىڭ اتىنا راسىمدەپ، ساتىپ جىبەرگەن.

تەرگەۋ بارىسىندا يەلەرى جوعالىپ كەتكەن كەمىندە ءتورت پاتەر ساتىلىپ كەتكەنى انىقتالدى. قىلمىسكەرلەر بارلىعى 45 رەت قىلمىسقا بارعان دەپ بولجانۋدا.

قىلمىستىق توپتىڭ بارلىق مۇشەسى قاماۋعا الىندى.