وزگە ەلدە تۋعان قازاق بالاسى قارسىلاسىن نوكاۋتقا ءتۇسىرىپ، الەم چەمپيونى اتاندى - كەسكىن
ول M-1 Challenge 78 تۋرنيرىنىڭ تيتۋلعا تالاس جەكپە-جەگىندە وتانداسى ماكسيم ديۆنيچتى تەحنيكالىق نوكاۋتپەن جەڭدى، دەپ جازادى ماسساگەت. ك ز.
جەكپە-جەك بەس مينۋتتان بەس راۋند فورماتىندا ءوتتى. رەفەري جەكپە-جەكتىڭ اياقتالۋىنا 15 سەكۋند قالعاندا توقتاتتى. بۇل كەزدە ىسماعۇلوۆتىڭ قارسىلاسى سوققىعا بەلسەندى قورعانىس تانىتا الماعان ەدى.
26 جاستاعى ىسماعۇلوۆ مانسابىنداعى 12-جەڭىسىنە قول جەتكىزدى. ونىڭ ەكى جەڭىلىسى بار. دامير ىسماعۇلوۆ ورىنبوردا تۋىپ-وسكەن جانە جەرگىلىكتى «بوەتس» كلۋبىنىڭ وكىلى. ول ارالاس جەكپە-جەكتەن دۇنيەجۇزىلىك اسسوتسياتسياسىنىڭ ازيالىق ديۆيزيونىندا ءوتىپ جۇرگەن «نومادتار شايقاسى» كاسىپقوي تۋرنيرىندە تالاي مارتە توپ جارعان.
ارالاس جەكپە-جەكتەن كەيبىر تۋرنيرلەردە ول قازاقستاننىڭ اتىنان دا شىققان. ال M-1 Global تۋرنيرىندە ىسماعۇلوۆ رەسەي ازاماتى رەتىندە تىركەلگەن. جەكپە-جەك اياقتالعاننان كەيىن بەرگەن سۇحباتىندا دامير كورەرمەندەرگە، باپكەرلەرگە، تۋىستارىنا جانە قازاقستاندىق جانكۇيەرلەرىنە العىس ءبىلدىردى.
«بۇگىنگى جەڭىسىممەن 60 اۋلاسى بار، ينتەرنەتسىز اۋىلدان شىققان بالانىڭ الەم چەمپيونى بولا الاتىنىن دالەلدەدىم. مەنىڭ قولىمنان كەلسە، سىزدەردىڭ دە قولدان كەلەدى. بۇل وسكەلەڭ ۇرپاققا ۇلگى بولسىن. بۇل ءبىزدىڭ جەڭىسىمىز. قازاقستانداعى اعايىنعا العىس. بۇل كەرەمەت قولداۋ. ولار مەنى قولداۋعا كەلدى. سالامالەيكۋم، قازاقستان. زور العىس بىلدىرەمىن»، - دەدى سپورتشى.
