موڭعوليا قازاقتارىنىڭ ادەبي انىقتامالىعى جارىق كوردى
«رۋحاني كەلبەت» اتتى موڭعوليا قازاقتارىنىڭ ادەبي- مادەني انىقتامالىعىنا سونداعى اقىن- جازۋشىلار، دراماتۋرگتەر، اۋدارماشىلار، عالىمدار مەن ادەبيەت زەرتتەۋشىلەرىنىڭ ەسىمى ەنگىزىلگەن.
كىتاپ س. امانجولوۆ اتىنداعى ش ق م ۋ- دىڭ بەرەل باسپاسىنان جارىق كوردى. بۇل ەرەكشە ەڭبەكتىڭ دۇنيەگە كەلۋىنە موڭعولياداعى ادەبيەتشىلەر مەن شىعىس قازاقساتاندىق عالىمدار قاتار اتسالىستى. ايتالىق، جالپى رەداكتسيا باسشىسى فيلولوگيا عىلىمدارىنىڭ دوكتورى، پروفەسسور باۋىرجان ەردەمبەكوۆ بولسا، جاۋاپتى رەداكتور اقىن، تاريح عىلىمدارىنىڭ كانديداتى موڭعوليالىق سۇراعان راحمەت ۇلى بولدى. ەركىنبەك بودەن ۇلى، گاۋھار قينايات قىزى، بەرىكحان يىسبەك ۇلى سىندى اۆتورلار دا قۇراستىرۋشىلار قاتارىندا.
س. امانجولوۆ اتىنداعى ش ق م ۋ- دىڭ 2-كۋرس ماگيسترانتى قىزىربەك دۇرگىنباي ۇلىنىڭ ماگيسترلىك ديسسەرتاتسياسى نەگىزىندە قۇراستىرىلعان جيناققا 176 اۆتوردىڭ تولىقتاي شىعارماشىلىق ءومىربايانى ەنگىزىلگەن. ءالى دە زەرتتەۋدى قاجەت ەتەتىن، ءمالىم دە بەيمالىم 18 تۇلعانىڭ قىسقاشا عۇمىرنامالارى مەن 106 تانىمال تۇلعانىڭ ەسىمى ەنگىزىلىپ وتىر. سونىمەن قاتار، موڭعوليا قازاقتارىنىڭ تاعدىرى مەن تاريحىنان، مادەنيەتى مەن ادەبيەتىنەن سىر شەرتەتىن 1921-2015 -جىلدار ارالىعىنداعى وقيعالاردى قامتيتىن ادەبي- مادەني جىلناما ۇسىنىلعان. موڭعولياداعى قازاق تىلىندەگى بۇقارالىق- اقپاراتتىق قۇرالدار مەن ءار جىلداردا جارىق كورگەن اقپاراتتىق باسىلىمدار تۋرالى مالىمەتتەردى دە اتالمىش كىتاپ بەتىنەن تابۋعا بولادا.
- انىقتامالىقتا موڭعوليا جەرىندە قازاق ادەبيەتى مەن مادەنيەتىنىڭ قالىپتاسىپ، دامۋىنا ۇلەس قوسقان مادەنيەت جانە قوعام قايراتكەرلەرىنىڭ شىعارماشىلىق ءومىربايانى تۇڭعىش رەت كوپشىلىك قاۋىمعا ۇسىنىلىپ وتىر. جالپى، بۇگىنگى تاڭدا شەت ەلدەگى قازاقتاردىڭ ادەبيەتى مەن ونەرىن ۇلتتىق قۇندىلىقتار تۇرعىسىنان زەرتتەۋدىڭ ماڭىزى زور، - دەيدى كىتاپتى قۇراستىرۋشىلاردىڭ ءبىرى باۋىرجان ەردەمبەكوۆ.
رەداكسيا القاسى جيناقتى الداعى ۋاقىتتا الىدە تولىقتىرىپ، جۇيەلەپ باسپاعا ۇسىنۋدى جوسپارلاپ وتىر.
دەرەككوز: altaynews.kz
