ءماسليحات دەپۋتاتتارى قاتەرلى دەرتكە شالدىققان بالالار ءۇشىن قان تاپسىردى

الماتى. قازاقپارات - الماتى ءماسليحاتىنىڭ دەپۋتاتتارى قاتەرلى دەرتكە شالدىققان بالالار ءۇشىن قان تاپسىردى، دەپ حابارلايدى قازاقپارات.

دونور بولۋ تۋرالى باستامانى دەپۋتات ازىربايەۆ مۇحيت كوتەرگەن. «بارلىعىمىزدىڭ ماقساتىمىز ءبىر. دونورلىقتى دارىپتەۋ، دونور بولۋ دەگەنىڭىز وزگە ادامعا ءومىر سىيلاۋ دەگەن ءسوز. بۇل بويىمىزدا ادامگەرشىلىك سەزىمىن وياتىپ، يمان قۇندىلىعىمىزدى ارتتىرا تۇسەدى»،  - دەدى مۇحيت ازىربايەۆ.

شەنەۋنىكتىڭ باستاماسىن بىرنەشە دەپۋتات قولداپ، بۇگىن دونور بولۋ ءۇشىن قان ورتالىعىنا كەلدى. قان ورتالىعى ماماندارىنىڭ ايتۋىنشا، دونور قانىنىڭ كولەمى 65 پايىزعا ارتىپ كەلەدى. 2008 -جىلدان بەرى دونورلاردىڭ سانى 181795 ادامنان 221910 ادامعا وسكەن.

ايتا كەتەيىك، جىل سايىن الەمدە 500 مىڭ بالا قاتەرلى قان دەرتىنە شالدىعىپ جاتىر، ونىڭ 100 مىڭعا جۋىعى ۋاقىتىندا قان قۇيىلماعان سوڭ قازا بولۋدا.

اۆتور: گۇلميرا عوسمانالي