قايىرىمدىلىق شاراسىنان تۇسكەن اقشا ناۋقاس بالالار ەمىنە جۇمسالادى
كوكشەتاۋداعى «اريستوكرات» مەيرامحاناسىندا وتكەن شاراعا «نۇر وتان» پارتياسى وبلىستىق فيليالى ءتوراعاسىنىڭ ءبىرىنشى ورىنباسارى عالىم بەكماعامبەتوۆ، مەملەكەتتىك ورگاندار، بيزنەس قۇرىلىمدار، ۇكىمەتتىك ەمەس ۇيىمداردىڭ وكىلدەرى مەن دەپۋتاتتار قاتىستى.
قايىرىمدى جانداردىڭ باسىن قوسقان شارانىڭ نەگىزگى ماقساتى كومەككە مۇقتاج جاندارعا قوعامنىڭ نازارىن اۋدارتۋ، ومىردە قيىن جاعدايدا قالعان بالالارعا قول ۇشىن بەرۋ بولىپ تابىلادى. سونىمەن قاتار، قايىرىمدىلىق بالىنا وبلىسىمىزدىڭ كوكشەتاۋ، ستەپنوگورسك قالالارى مەن ءبىرقاتار اۋداندارىنان ارنايى شاقىرىلعان دەلەگاتتار دا بۇل كۇنى يگىلىكتى ىستەن ايانىپ قالمادى. مۇقتاجعا كومەكتەسۋگە قاشاندا ءازىر ەكەندىكتەرىن جەتكىزىپ، ورتاعا مۇمكىندىگى شەكتەۋلى بالالارعا اقشالاي كومەك بەرۋ ءۇشىن ادەيىلەپ قويىلعان «جاقسىلىق سەبەتىنە» قارجى سالدى.
اقمولا وبلىسىنىڭ ىسكەر ايەلدەر قاۋىمداستىعىنىڭ ءتورايىمى دامەلى قويشينانىڭ ايتۋىنا قاراعاندا، قايىرىمدىلىق شاراسىنان تۇسكەن اقشا سال اۋرۋىمەن ناۋقاستانعان بالالارعا ميدىڭ بيواكۋستيكالىق كوررەكسياسى اپپاراتىن ساتىپ الۋعا جۇمسالماق.
بۇل كۇنى اتا- انا قامقورلىعىنسىز قالعان بالالاردىڭ، مۇگەدەكتەردىڭ قولىمەن جاسالعان قولونەر تۋىندىلارىنا كوپشىلىك زور قىزىعۋشىلىق تانىتىپ، كورمەدەن ۇناعان زاتتارىن ساتىپ الىپ جاتتى. بۇل دا قامقورلىققا مۇقتاج بالالارعا دەگەن وزىندىك ءبىر قولداۋ بولدى.
