مىرزاتاي جولداسبەكوۆتىڭ مەرەيتويىندا عالىمنىڭ ءوزى بەينەلەنگەن ەرەكشە كىلەم سىيعا تارتىلدى
ل. ن. گۋميلەۆ اتىنداعى ەۋرازيا ۇلتتىق ۋنيۆەرسيتەتىندە 2017 -جىلدىڭ 26-27 -مامىرى كۇندەرىنە جوسپارلانعان «تۇركى الەمى جانە حالىقارالىق بايلانىستار: تاريح، تۇلعا، كەلەشەك» كونفەرەنسياسى باستالدى. حالىقارالىق عىلىمي كونفەرەنسياعا ارمەنيا، ازەربايجان، گەرمانيا، تۇركيا، ۆەنگريا، وزبەكستان، رەسەيدىڭ جانە ەلىمىزدىڭ ايگىلى عالىمدارى قاتىسادى دەپ كۇتىلۋدە.
وندا م. جولداسبەكوۆتىڭ قوعام قايراتكەرى، ديپلومات، عالىم رەتىندەگى تۇلعاسى، كوشپەلىلەر مۇراسى مەن تاريحي ەسكەرتكىشتەرى، تۇركىتانۋدىڭ كەلەشەگى مەن دامۋ ماسەلەلەرى تالقىلانادى. كونفەرەنتسيانىڭ اشىلۋ سالتاناتىندا ەلىمىزدىڭ مەملەكەت جانە قوعام قايراتكەرلەرى، دەپۋتاتتار، اكىمدەر، قر جوعارى وقۋ ورىندارىنىڭ رەكتورلارى قۇتتىقتاۋ لەبىزدەرىن ءبىلدىرىپ، سىي- سىياپاتتارىن تابىستادى.
بەلگىلى اقىن، ءال- فارابي اتىنداعى قاز ۇ ۋ رەكتورىنىڭ كەڭەسشىسى باۋىرجان جاقىپ م. جولداسبەكوۆكە ارناۋ ولەڭىن وقىپ، ءال-فارابي التىن مەدالىن تاقتى. قازاق ۇلتتىق ونەر ۋنيۆەرسيتەتىنىڭ رەكتورى، قازاقستاننىڭ ەڭبەك ەرى ايمان مۇساقوجايەۆا ديزاينەر ماماندىعىن مەڭگەرىپ جاتقان ستۋدەنتتەرى تىككەن اسەم شاپاندى م. جولداسبەكوۆتىڭ يىعىنا جاپتى. قازاقستان حالقى اسسامبلەياسى ءتوراعاسىنىڭ ورىنباسارى دارحان مىڭباي مەرەيتوي يەسى بەينەلەنگەن ەرەكشە كىلەمدى سىيعا تارتتى.
«كىلەمنىڭ توركىنى قازاقتىڭ التايىندا. التايدا پازىرىق اتتى كىلەم بولعان. بۇرىندارى ەلگە ەڭبەگى سىڭگەن، ۇلكەن عۇلاما عالىمداردى عانا بەينەلەنگەن ەكەن. سول شىعىستىڭ داستۇرىمەن بەينەڭىزدى كىلەمگە سالدىق. بۇل ءسىزدىڭ ەرەن ەڭبەگىڭىزدىڭ بەلگىسى»، - دەدى دارحان مىڭباي.
«وسى جاسىما دەيىن ەشكىمگە قيانات جاسامادىم، ەشكىمنىڭ باعىن قىزعانبادىم، كىسىنىڭ الا ءجىبىن اتتامادىم، ادامنىڭ جامانى جوق دەپ ەسەپتەدىم، قازاقتى جانىمداي كوردىم. ۇلى اعالارىم م. اۋەزوۆ، ءا. مارعۇلان كورمەگەن تاۋەلسىزدىكتى كوردىم، سول باقىتتىڭ نۇرىنا شومىلىپ جۇرگەن اداممىن. ۇرپاققا ايتارىم، اللا تاعالا بەرگەن جارىق نۇرىن اقىلمەن پايدالانا بىلىڭدەر، تۋرا جولدان اداسپاي، تۋرا جۇرىڭدەر»، - دەپ وسيەت ايتتى مەرەيتوي يەسى.
شارا سوڭىندا ق ر جازۋشىلار وداعىنىڭ ءتوراعاسى نۇرلان ورازالين، قازاقستان رەسپۋبليكاسى ۇلتتىق عىلىم اكادەمياسىنىڭ (ق ر ۇ ع ا) اكادەميگى، ف. ع. د. ، پروفەسسور سەرىك قيرابايەۆ، ق ر ۇ ع ا اكادەميگى، پروفەسسور جابايحان ءابدىلدين جانە باۋىرجان جاقىپ مىرزاتاي جولداسبەكوۆتىڭ ءومىرى مەن شىعارماشىلىق قىزمەتىنە ارنالعان جاڭا كىتاپتاردىڭ تۇساۋىن كەستى.
اۆتور: ايجان سەرىكجان قىزى
