سەمەيلىك تراكتورشى ءوز قاراجاتىنا ءاليحان بوكەيحانعا ەسكەرتكىش قويدى

ەر ادام قىمباتقا تۇسكەن مونۋمەنت دەمونتاجدالا ما دەپ الاڭداپ وتىر، - دەپ حابارلايدى Tengrinews.kz ءتىلشىسى. تراكتورشى "الاش" قوزعالىسىنىڭ كوشباسشىسىنا ەسكەرتكىش قويۋ يدەياسىن ءتورت جىل بويى ويلاستىرىپ جۇرگەن.
الايدا بىردەن كىرىسىپ كەتۋگە قارجى ماسەلەسى توقتاۋ سالعان. 2016 -جىلى ءاليحان بوكەيحاننىڭ 150 جىلدىعىندا بەرىكحان ءجۇمادىلوۆ شەشىم قابىلداپ، قاراجات جيناي باستايدى. ول 500 مىڭ تەڭگە جينايدى. وسى قاراجاتپەن ول جەرگىلىكتى مۇسىنشىلەرگە بارعان.
«ولار مەنىڭ تانىستارىم. ءوز ءىسىنىڭ شەبەرى. ولار ساياسي قايراتكەرلەردىڭ قوقىستان تاۋىپ العان ەسكى بيۋستتەرىن رەستاۆراتسيالاۋعا كومەكتەسكەن ەدى. تاريحىمىز عوي دەپ، جيناپ ءجۇرمىن. وتكەن جىلى تاۋەلسىزدىگىمىزدىڭ 25 جىلدىعىن اتاپ وتتىك. بۇل سول تاۋەلسىزدىككە ءبىرىنشى بولىپ كۇرەسكەن ءاليحان بوكەيحاننىڭ 150 جىلدىعىمەن تۇسپا- تۇس كەلدى عوي»، - دەيدى بەرىكحان ءجۇمادىلوۆ.
ەسكەرتكىشتى جاساۋعا بىرنەشە اي قاجەت بولعان. جينالعان بارلىق قاراجات ماتەريالعا عانا جۇمسالىپتى. «ءبىز كومپوزيت ماتەريالدى قولداندىق، ونىڭ قۇرامىندا سەمەنت بەلگىلى ءبىر پروپورتسيادا بار، بۇل قۇرام وتە جاقسى قولدانىلىپ كەلەدى. تاستان دا جاساۋعا بولار ەدى، ءبىراق قىمباتقا تۇسەر ەدى. بۇل ماتەريالمەن دە ەسكەرتكىش كوپ جىل تۇرادى، قانداي اۋا رايى بولسا دا مىزعىمايدى. وبرازدى پورترەتىنە قاراپ سالدىق. مونۋمەنتتى تاريحي تۇلعانىڭ بويىمەن تۇگەلدەي الدىق. ءاليحان بوكەيحاننىڭ پاراق ۇستاپ تۇرعان بەينەسىن سالدىق، پارتيالاستارىنا "الاشتىڭ" جارلىعىن وقىپ تۇرعان ءساتى شىعار. ەسكەرتكىش كۆارتسپەن قاپتالعان، ۇستىنەن قولا جالاتىلعان»، - دەيدى ءمۇسىنشى بولات كارىبايەۆ.
ەسكەرتكىش ەرتىس وزەنىنىڭ جاعاسىندا ورنالاستى. وسى ماڭدا ونىڭ اۆتورى - تراكتورشى بەرىكحان ءجۇمادىلوۆ تۇرادى. ەر ادام جەرگىلىكتى تۇرعىنداردى شاقىرىپ، سالتاناتتى تۇردە اشقىسى كەلگەن، الايدا ەندى بۇل ەڭبەگى كۇيىپ كەتە مە دەپ الاڭداپ وتىر.
«ەسكەرتكىشتى دەمونتاجداۋ كەرەك شىعار. سويتسەك، اكىمدىك قارسى ەكەن. ادامدار قايتا- قايتا كەلدى. مۇنى زاڭسىز دەپ، يدەيامنان باس تارتۋىمدى سۇرادى. باستاپقىدا زاڭدى تۇردە جەردى تىركەپ، رۇقسات الۋىم كەرەك ەدى. وسىنداي ەسكەرتۋلەر جاسالا باستاعاندا ەسكەرتكىشتى قويۋعا اسىقپادىق. بىرەۋ- مىرەۋ ساتىپ الا ما دەپ تە ويلادىق. ءبىراق ەسكەرتكىش جاسالىپ قويدى عوي. شەبەرحانادا تۇرعانىنا ءۇش اي بولدى. سوسىن شەبەرلەر ونى ماعان بەرىپ، مەن ءوز كەزەگىمدە ونى ورناتىپ قويدىم. ەندى الىپ تاستاۋ كەرەك دەپ جاتىر. وكىنىشتى. بۇل اق نيەتىمىزدەن جاسالعان دۇنيە عوي. قانشاما ەڭبەك پەن قاراجات»، - دەيدى تراكتورشى. سويتسەك، قالالىق اكىمدىك ءاليحان بوكەيحانعا ەسكەرتكىش قويعالى جاتىر ەكەن. قاراجات تا قاراستىرىلعان، كونكۋرس تا ءوتىپ قويعان.