شەكارادا اقشاسىنان ايىرىلعان جەسىر انانىڭ ءىسىن باس پروكۋراتۋرا باقىلاۋعا الدى

استانا. قازاقپارات - شەكارادا كەدەن قىزمەتكەرلەرى اقشاسىن تاركىلەپ العان گۇلجان ءماۋىتحاننىڭ ءىسىن باس پروكۋراتۋرا باقىلاۋعا الدى.

بۇل تۋرالى «قازاقپارات» تىلشىسىنە ساياساتتانۋشى ەرلان سايروۆ ءمالىم ەتتى.

ايتا كەتەيىك، ە. سايروۆ اتاجۇرتقا ورالامىن دەپ كەلگەن جالعىزىلىكتى اناعا قولداۋ كورسەتۋدە. وسى ماسەلەگە قاتىستى 23 -مامىر كۇنى ارنايى باسپا ءسوز ءماسليحاتىن دا وتكىزگەن بولاتىن. «وسكەمەندە سوت وتىرىسى وتەدى. ادۆوكاتتار ارقىلى كەشە ق ر باس پروكۋراتۋراسىنا وسى تەرگەۋشى ورگانداردىڭ، ونىڭ ىشىندە كەدەن قىزمەتى مەن شەكاراشىلاردىڭ زاڭسىز ارەكەتتەرى جونىندە ارىز-شاعىم كىرگىزدىك. ەندى ارى قاراي باس پروكۋراتۋرانىڭ وكىلدەرىمەن جۇمىس ىستەيتىن بولامىز. ويتكەنى بۇل جەردە شەكاراشىلار مەن كەدەن قىزمەتكەرلەرى زاڭدى بەلدەن باسىپ جىبەرگەن. ءبىز ادۆوكاتتارمەن بىرىگىپ، قۇجاتتاردىڭ بارلىعىن باس پروكۋراتۋراعا كىرگىزدىك. ارى قاراي ەندى قاداعالاپ وتىرامىز»، - دەدى بەلگىلى قوعام بەلسەندىسى ەرلان سايروۆ «قازاقپارات» تىلشىسىنە بەرگەن سۇحباتىندا.

ەسكە سالا كەتسەك، بۇدان بۇرىن ب ا ق بەتتەرىندە شىعىس قازاقستان وبلىسىنا قاراستى زايسان اۋدانىنىڭ «مايقاپشاعاي» كەدەن بەكەتىنەن قازاقستانعا قىتايدان كوشىپ كەلە جاتقان جەسىر انانىڭ 59900 ا ق ش دوللارىن شەكاراشىلار تاركىلەپ العاندىعى حابارلانعان بولاتىن. كۇيەۋىنەن ەرتە جەسىر قالىپ، ەكى بالاسىن جالعىز ءوسىرىپ كەلگەن گۇلجان ءماۋىتحان قىتايداعى وزىنە تيەسىلى ءۇيى مەن بار دۇنيە- مۇلكىن ساتىپ، ول اقشاعا استانا قالاسىنان ءۇي الۋدى كوزدەگەن ەكەن.

اۆتور: جاسۇلان جولدىبايەۆ