اسقار مامين مەتالدىڭ باعاسىنا ىقپال ەتەتىن نەگىزگى فاكتورلاردى اتادى
«ءبىرىنشىسى، بۇل دامۋشى ەلدەر تاراپىنان تۋىندايتىن سۇرانىس. مينەرالدى رەسۋرستارعا سۇرانىس بولجامىنىڭ بارىنشا ماڭىزدى بولىگى ءۇندىستان مەن قىتاي تاراپىنان الداعى ۋاقىتتا سۇرانىستىڭ ارتا ءتۇسۋى بولماق. مەتالعا دەگەن سۇرانىستىڭ 50 پايىزدان استامى 2030 -جىلعا قاراي وسى ەكى ەلگە تيەسىلى بولماق»، - دەدى ول.
ماميننىڭ ايتۋىنشا، ەكىنشى فاكتور بۇل رەسۋرستار كەنىن الۋداعى پروبلەمالار. ياعني كەن ورىندارىنىڭ باسىم بولىگى ينفراقۇرىلىمى وتە ناشار دامىعان ەلدەردەن تابىلۋدا. ماسەلەن، جاڭادان بارلانعان مىس كەن ورىندارىنىڭ 50 پروتسەنتكە جۋىعى الەمدەگى ەڭ تۇراقسىز وڭىرلەردە ورنالاسقان.
«ءۇشىنشىسى- ەكولوگيالىق فاكتورلاردىڭ ىقپالى. سۋ تاپشى وڭىرلەردەگى مينەرالدى شيكىزاتتى وندىرۋگە باعىتتالعان كەيبىر وپەراتسيالاردىڭ قۇنى سۋ مەن كومىرتەكتىڭ قوستوتىعىن كادەگە جاراتۋ شىعىندارىن ەسەپكە العاندا 16 پروتسەنتكە قىمباتتاۋى مۇمكىن»، - دەپ اتاپ ءوتتى ۇكىمەت باسشىنىڭ ءبىرىنشى ورىنباسارى.
اسقار مامين ءتورتىنشى فاكتور رەتىندە تەحنولوگيالىق پروتسەسستەردى اتادى. ونىڭ پايىمىنشا، باستى تەحنولوگيالىق ترەند «يندۋستريا 4.0» ەلەمەنتىن پايدالانۋ ارزان تەحنولوگيالىق شەشىمدەردىڭ كومەگىمەن ءوندىرىس قۇنىن تومەندەتۋگە سەپتىگىن تيگىزەدى.
«ءبىز 4.0 تەحنولوگياسىن قولدانۋ ارقىلى وزىندىك قۇندى ەكى ەسەگە دەيىن تومەندەتۋگە بولاتىن مىسالداردى بىلەمىز. وسىعان بايلانىستى ءونىمنىڭ باسەكەگە قابىلەتتىلىگى كۇرت ارتىپ، ءونىم شىعارۋ كولەمى ەسەلەنە تۇسەدى»، - دەدى ول.
سونىمەن قاتار پرەمەر- ءمينيستردىڭ ءبىرىنشى ورىنباسارى قازاقستان الەمدە تەمىر كەنى قورى بويىنشا - 7، ال بولات ءوندىرىسىنىڭ كولەمى بويىنشا 33-ورىندا ەكەندىگىن اتاپ ءوتتى.
«ونەركاسىپتىك ءوندىرىستىڭ جالپى قۇرىلىمىنداعى تاۋ- كەن مەتاللۋرگياسىنىڭ ۇلەسى 18 پايىزدان اسىپ جىعىلادى. وسى جىلدىڭ 4-ايىنىڭ قورىتىندىسىندا قازاقستان ەكونوميكاسىنىڭ ءوسىمى 3,7 پايىزدى قۇرادى»، - دەدى اسقار مامين.
اۆتور: مارلان جيەمباي
