مۇراجاي، مۇراعات جانە كۇيساندىق سوزدەرى تەرمينولوگيا كوميسسياسىندا بەكىتىلمەگەن
بۇل تۋرالى قازاقستان رەسپۋبليكاسى مادەنيەت جانە سپورت مينيسترلىگى تىلدەردى دامىتۋ جانە قوعامدىق- ساياسي جۇمىس كوميتەتى ءتوراعاسىنىڭ ورىنباسارى عالىمجان مەلدەشوۆ ءمالىم ەتتى، دەپ حابارلايدى «قازاقپارات» ح ا ا ءتىلشىسى.
«كەيىنگى كەزدەرى مۋزەي، ارحيۆ سوزدەرى جايلى ەكىۇداي پىكىر ايتىلىپ ءجۇر. تەرمينولوگيا كوميسسياسىندا مۇراجاي نەمەسە مۇراعات نەمەسە كۇيساندىق سوزدەرى بەكىتىلگەن ەمەس. ول سوزدەر پيانينو، فورتەپيانو، مۋزەي جانە ارحيۆ كۇيىندە قالعان ەدى. ءبىراق ءبىزدىڭ ارىپتەستەرىمىز، جۋرناليستەر بۇل سوزدەردى ءوز ىڭعايىنا قاراي قولدانادى. وعان ەش قارسىلىعىمىز دا جوق، اۋىزەكى تىلدە قولدانا بەرسىن. ءبىراق، نەگىزگى بەكىتىلگەن تەرميندەر - پيانينو، فورتەپيانو، مۋزەي جانە ارحيۆ»، - دەدى عالىمجان سارسەنباي ۇلى تەرمين جاسام باعىتتارى تۋرالى استانادا وتكەن سەمينار- كەڭەستە.
سونىمەن بىرگە، عالىمجان مەلدەشوۆ تەرمينولوگياعا قاتىستى سىڭىسپەي جۇرگەن سوزدەر تۋرالى اڭگىمەلەدى. «جۋرناليستەردەن «ءاۋىت»، «قۇرسىم» سوزدەرىنىڭ ماعىناسىن بىلەسىزدەر مە دەپ سۇراعىم كەلەدى. نەمەسە «جەلكوز»؟ بۇل سوزدەر تەرمينولوگيا كوميتەتىندە، تەرمينولوگيا كوميسسياسىندا بەكىتىلگەن، ءبىراق حالىق اراسىندا قولدانىلمايدى. جاسىراتىنى جوق، وسى تۇرعىدا ءوز ارىپتەستەرىمىز بەن عالىمدار تاراپىنان ءبىرقاتار سىن ايتىلۋدا. سوندىقتان، بۇگىنگى سەميناردا عالىمدارمەن، تەرمينولوگتارمەن تەرمينجاسامنىڭ نەگىزگى باعىتتارىن ايقىنداپ، قولدانىستاعى سوزدەرگە مۇمكىندىگىنشە ءسىڭىستى سوزدەردى ەنگىزۋ ماسەلەلەرىن تالقىلايمىز»، - دەدى ول.
كوميتەت وكىلى تەرمينولوگيانىڭ ءبىر عانا سالامەن شەكتەلمەيتىنىن، ءار سالا ءوز تەرميندەرىن ۇسىناتىنىن اتاپ ءوتتى.
«ۇلتتىق ەكونوميكا مينيسترلىگى، ۇلتتىق كومپانيالار، مەديتسينا، عىلىم، تەحنيكا سالاسىنىڭ وكىلدەرى وزدەرىنە ىڭعايلى تەرميندەردى ۇسىنادى. ال تەرمينولوگيالىق كوميسسيا مۇشەلەرى مۇمكىندىگىنشە سول سالا ماماندارىنىڭ ىڭعايىنا كەلەتىن سوزدەردى ىرىكتەپ الىپ، قولدانىسقا ەنگىزۋگە تىرىسادى».
ايتا كەتەيىك، بۇگىن استاناداعى ق ر ۇلتتىق اكادەميالىق كىتاپحاناسىندا «قازىرگى تەرمين جاسامنىڭ باعىتتارىن ايقىنداۋ ماسەلەلەرى» تاقىرىبىندا رەسپۋبليكالىق سەمينار- كەڭەس ءوتتى. وعان ق ر ۇكىمەتى جانىنداعى رەسپۋبليكالىق تەرمينولوگيا كوميسسياسىنىڭ مۇشەلەرى، تەرمينولوگ- عالىمدار، ق ر مينيسترلىكتەرىنىڭ ءتىل سالاسىنا جاۋاپتى قىزمەتكەرلەرى قاتىستى.
اۆتور: ايجان سەرىكجان قىزى
