قازاقستاننان قىتايعا ميا تامىرىن تاسىمالداۋ توقتاي ما؟

استانا. قازاقپارات - بۇگىن پارلامەنت سەناتىنىڭ جالپى وتىرىسىندا دەپۋتات مۇرات باقتيار ۇلى وڭتۇستىك وڭىرلەردەن ميا تامىرى قىتايعا قاداعالاۋسىز تاسىمالدانىپ جاتقانىن ايتتى، دەپ حابارلايدى قازاقپارات.

«قازىر ماماندارىمىز ەلمىزدە جالپى 1,5 مىڭعا تارتا دارىلىك وسىمدىكتەردىڭ تۇرلەرى وسەتىندىگىن، ولاردىڭ تەك 40 قا جۋىعىنىڭ عانا مەديتسينالىق شيكىزات رەتىندە پايدالانۋ قورى بار ەكەنىن ايتىپ وتىر. وكىنىشكە قاراي، وڭتۇستىك وڭىرلەردە عانا وسەتىن ەمدىك ءدارى-دارمەك جاساۋدا تاپتىرماس باعالى ميا تامىرىن جيناۋ توقتاماي تۇر. تەك  قىزىلوردا وبلىسى بويىنشا ەكى جىلدىڭ ىشىندە 1800 توننا قىزىل ميا تامىرى قىتايعا جونەلتىلسە، وڭتۇستىك قازاقستان وبلىسى اۋماعىنان سوڭعى ءتورت جىل ىشىندە 63000 توننا ميا تامىرى جينالىپ، وزگە ەلدەرگە جىبەرىلگەن. سونىڭ ناتيجەسىندە مىڭداعان گەكتار اريدتىك ايماقتارداعى جەرلەر دەگراداتسياعا ۇشىراۋدا، تابيعاتقا وراسان زور زيان كەلۋدە»، - دەپ توقتالدى باقتيار ۇلى ق ر ۇكىمەت باسشىسى باقىتجان ساعىنتايەۆتىڭ اتىنا جولداعان دەپۋتاتتىق ساۋالىندا.

ونىڭ سوزىنە قاراعاندا، ەلىمىزدىڭ ماماندارى دارىلىك وسىمدىكتەردى قولدان وسىرەتىن جانە ونى تەرەڭ وڭدەيتىن تەحنولوگيالاردى پايدالانۋدى جولعا قويسا، ەل ەكونوميكاسىنا ءجۇز ميلليونداعان تابىس اكەلۋگە بولاتىنىن ايتۋدا.

«مىسالى، كورشى وزبەكستاندا ميا تامىرىن قولدان ءوسىرىپ، تەرەڭ وڭدەيتىن جاپونيا، قىتاي، ا ق ش ينۆەستيتسيالارى سالىنعان 20 ءىرى كاسىپورىن جۇمىس ىستەيدى. ولار ميا ەكسپورتىنىڭ 70 پايىزدان استامىن تەرەڭ وڭدەپ ساتۋدا»، - دەدى سەناتور.

وسى ورايدا ول وسىمدىك الەمىن قورعاۋ تۋرالى ارنايى زاڭ جوق ەكەنىن ايتا كەلە، سوندىقتان قىسقا مەرزىمدە بۇل سالادا ءتيىستى زاڭ قابىلداۋ كەرەكتىگىن اتاپ ءوتتى.

اۆتور: رۋسلان عابباسوۆ