اسكەري ازاماتتاردىڭ جەسىرلەرىنە وتەماقى مولشەرى جاڭا ءۇيدىڭ قۇنىمەن ەسەپتەلەدى

استانا. قازاقپارات - بۇگىن ق ر پارلامەنتى سەناتىنىڭ جالپى وتىرىسىندا «قازاقستان رەسۋپبليكاسىنىڭ كەيبىر زاڭنامالىق اكتىلەرىنە قورعانىس جانە اسكەري قىزمەت ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى ەكى وقىلىمدا قارالىپ، قابىلداندى،

 دەپ حابارلايدى قازاقپارات.

 «اسكەري قىزمەتتىڭ الەۋمەتتىك اسپەكتىلەرى، تۇرعىن ءۇي قاتىناستارى تۋرالى زاڭناماعا ەنگىزىلەتىن وزگەرىستەر دە كورسەتىلگەن. ولار اكەري قىزمەتشىلەرگە جانە ارناۋلى مەملەكەتتىك ورگانداردىڭ قىزمەتكەرلەرىنە دە قاتىستى. اتاپ ايتقاندا، ازاماتتار اسكەري مىندەتتەرىن ورىنداعان كەزدە عانا ەمەس، سونىمەن قاتار وسى قىزمەت بارىسىندا قازا تاپقان اسكەري قىزمەتشىلەردىڭ جەسىرلەرىنە قىزمەتتىك تۇرعىن ءۇي بەرۋ ۇسىنىلادى. بۇل رەتتە قىزمەتكەرلەردىڭ جەسىرلەرىنە وتەماقى مولشەرىن جاڭا تۇرعىن ءۇيدىڭ قۇنىنا سۇيەنە وتىرىپ ەسەپتەۋ قاراستىرىلىپ وتىر»، - دەدى ق ر قورعانىس ءمينيسترىنىڭ ورىنباسارى تالعات مۇحتاروۆ زاڭ جوباسى بويىنشا بايانداما جاساۋ بارىسىندا.

 بۇدان بولەك ول زاڭ جوباسى اياسىندا ءبىلىم بەرۋ ماسەلەلەرى بويىنشا دە تۇزەتۋلەر ەنگىزىلىپ جاتقاندىعىن جەتكىزدى.

 «بىرىنشىدەن، ق ر قارۋلى كۇشتەرىندە تەحنيكالىق جانە كاسىپتىك ءبىلىم بەرۋ سالاسىن كەڭەيتۋ ەسكەرىلىپ وتىر. 2015 -جىلى ءۇش اسكەري مەكتەپ ءبىلىم جانە عىلىم مينيسترلىگىنەن قورعانىس مينيسترلىگىنىڭ قاراماعىنا اۋىستى. ولار مەكتەپ، ينستيتۋت، ۋنيۆەرسيتەت ءبىرىڭعاي اسكەري ءبىلىم بەرۋ جۇيەسىن قالىپتاستىرۋعا مۇمكىندىك بەردى. ەكىنشىدەن، بۇل اسكەري وقۋ ورىندارىنان وقۋدان شىعارۋ ءتارتىبىن رەگلامەنتتەۋ قاراستىرىلعان. قولدانىستاعى زاڭنامادا وسى ماسەلە ءتيىستى دارەجەدە رەتتەلمەگەن»، - دەدى ءمينيستردىڭ ورىنباسارى.

سونىمەن قاتار ول اسكەري مەديتسينالىق كادرلاردى دايارلاۋ ماقساتىندا اسكەري ينتەرناتۋرا ەنگىزۋ ماسەلەسىنە توقتالدى.

«ءبىز اسكەري مەديتسينا فاكۋلتەتىن اشتىق جانە ينتەرناتۋراسىز اسكەري دارىگەرلەرلى دايارلاۋ مۇمكىن ەمەستىگىن جەتكىزگىمىز كەلەدى. مۇنىمەن قوسا، «اسكەري عىلىم» دەگەن ۇعىمدى ەنگىزۋ جانە قورعانىس زەرتتەۋلەر جۇيەسىن ودان ارى قاراي دامىتۋ ماسەلەسى قامتىلىپ وتىر. قازىرگى زامانعى سوعىستاردى جۇرگىزۋدىڭ جاڭا شارتتارى عىلىمي تۇرعىدان تياناقتاۋدى قاجەت ەتەدى. اسكەري عىلىمي الەۋەتتى كۇشەيتپەي، ەلدىڭ اسكەري قاۋىپسىزدىگىن ناعايتۋ تۋرالى ءسوز قوزعاۋ مۇمكىن ەمەس. ناتيجەسىندە، وسى تۇزەتۋلەر ق ر قورعانىس مينيسترلىگى جۇرگىزىپ جاتقان كادرلار دايارلاۋ جۇيەسىن جەتىلدىرۋ جانە اسكەري عىلىمدى دامىتۋ جونىندەگى جۇمىستى اياقتاۋعا مۇمكىندىك بەرەدى»، - دەدى مۇحتاروۆ.

اۆتور: رۋسلان عابباسوۆ