قازاقستاندىق وليمپيادا چەمپيونىنىڭ ارەكەتى جانكۇيەردىڭ جۇرەگىن ەلجىرەتتى
نازيم يۋنۋسوۆ اتتى جەلى قولدانۋشىسى Instagram جەلىسىندەگى پاراقشاسىندا راحيموۆتىڭ اۋىر جاعدايدا قالعان ادامعا كومەگى تۋرالى جازعان.
«مۇنداي وقيعالاردى ادەتتە ينتەرنەتتەن عانا كورەمىز. سوندىقتان مەن مۇندايعا سەنە بەرمەيتىنمىن. بۇگىن نيجاتپەن ءبىراز جوبالاردى تالقىلاۋعا كەزدەستىك، قاسىمىزعا 45-55 (ونى د دەپ اتايىق) جاس ارالىعىنداعى ادام كەلىپ، قولدان كەلەتىن كومەك بەرۋدى ءوتىندى. وسى كەزدە داياشى مەن اكىمگەر جۇگىرىپ كەلىپ ول ادامدى قۋا باستادى. نيجات ءبارى دۇرىس ەكەنىن ايتىپ، د- دان اقشا نەگە كەرەكتىگىن سۇرادى. د قارنى اشقانىن ايتتى، نيجات بىردەن تاماققا تاپسىرىس بەردى، ارى قاراي ءبىز د- نىڭ باسىنان نە وتكەنىن تىڭداپ وتىردىق. ول تابىس تابۋعا كەلگەنىن، الايدا، ونى الداپ، زاتتارى مەن قۇجاتتارىن تارتىپ العانىن ايتتى. ەندى ۇيگە قايتا الماي جۇرگەنىن ايتىپ، كوز جاسىن ءسۇرتتى.
نيجات زەر سالا تىڭداپ، تاماق سۋىماي تۇرىپ ءىشىپ الىڭىز دەگەندى عانا ايتتى. وسى كەزدە وقيعانىڭ اۋىرلىعى مەن نيجاتتىڭ ادامگەرشىلىگىنە تاڭدانىپ وتىردىم. ال نيجات كۇلىپ قانا قويىپ، كىممەن بولمايدى دەيسىڭ دەپ قانا وتىردى.
اقىرى وعان جولعا تاماق الىپ، ۆوكزالعا باردىق. اۆتوبۋسقا وتىرعىزدىق، نيجات ونىڭ جولىنا اقشا مەن ءوز ءنومىرىن بەردى دە، جەتكەندە حابارلاسۋىن، ايتپەسە الاڭدايتىنىن ايتتى. ساتتىلىك تىلەدىك تە قايتتىق. د وزىنە ريو وليمپياداسىنىڭ چەمپيونى كومەكتەسكەنىن بىلمەي دە كەتەتىن شىعار.
جازعانىمنىڭ ءبارى شىندىق، جارناما ەمەس، ءار سوزىمە جاۋاپ بەرۋگە دايىنمىن.
ال ەڭ باستىسى بۇل پوستپەن ماقتانعىم كەلگەن جوق! ساۋاپ ايتىلماي ىستەلگەن جاقسىلىققا عانا بەرىلەتىنىن بىلەمىن. ءبىراق ءوزىمدى ۇستاي المادىم، بۇل الەمدە جاقسىلىقتىڭ بارىن، نيجات سياقتى ىزگى ادامداردىڭ بارىن جايىپ سالعىم كەلدى.
P. S. نيجاتپەن تانسىقانىما كوپ بولعان جوق. مىنا جازعانىم ءۇشىن ۇرساتىنىن بىلەمىن. مەن بۇل وقيعا ارقىلى ادامداردى ىزىگىلىككە شاقىرعىم كەلدى»، - دەيدى جەلى قولدانۋشىسى.
