الماتىلىق بويجەتكەن بويىنىڭ تىم ۇزىندىعىنان جىگىت تاپپاي جۇرگەنىن ايتىپ، مۇڭىن شاقتى
الداعى كۇزدە جاسى 27 گە كەلەتىن، بويى 1.80 سانتيمەتر كەيىپكەرىمىز ءالى كۇنگە دەيىن تۇرمىس قۇرماي جۇرگەنىن بويىنىڭ ۇزىندىعىنان كوردى.
- ماعان كەزدەسەتىن جىگىتتەردىڭ بويلارى 165-170 سانتيمەتر. ال بويى ۇزىن جىگىتتەردىڭ كوپشىلىگى وزگە ۇلت وكىلدەرىنەن نەمەسە مەتيس بولىپ جاتادى. وكىنىشكە قاراي، بۇگىنگى قازاق جىگىتتەرىنىڭ كوپشىلىگىنىڭ بويى كىشكەنتاي. بويى ۇزىندارى سيرەك كەزدەسەدى، ءبىراق ولارمەن ويىمىز سايكەس كەلمەي جاتادى، - دەيدى اياۋلىم.
بۇگىندە اياۋلىم جۇرەگى قانشا قالاپ تۇرسا دا، بويى كىشكەنتاي ەكى جىگىتپەن قوشتاسقان.
«ارينە، انام مەن قۇربىلارىمنىڭ ءبارى اقىماق ەكەنىمدى ايتىپ، ماسەلە بويدا ەمەس، ويدا، سىيلاستىقتا دەپ ايتادى. ءبىراق مەن ءوزىمنىڭ ارقا سۇيەر ازاماتىمنىڭ بويى ۇزىن بولعانىن قالايمىن. بىرەۋلەر مەنى تىم ءبالسىنىپ كەتتى دەپ سوگەتىن شىعار. بويى كىشكەنتاي جىگىتپەن كوشەدە جاي عانا كەتىپ بارا جاتسام، بۇرىلىپ قارايتىندار از ەمەس. ونداي كەزدە مەن ءوزىمدى وتە جايسىز سەزىنەمىن»، - دەپ مۇڭىن شاقتى اياۋلىم.
اياۋلىم ەشقانداي كەدەرگىگە قاراماي، بويى الاسا جىگىتتەرمەن كوڭىل قوسقىسى كەلىپتى. الايدا جىگىتتەردىڭ وزدەرى كەيىن حات-حابارسىز كەتكەن. ال قاتارلاستارى ونىڭ تىم ۇزىن ەكەنىن ازىلدەۋدەن شارشاعان ەمەس. ءتىپتى، كەيبىر دوستارىمەن تىم قاتتى ءازىلى ءۇشىن ارالاسپايدى ەكەن.
«ءبىزدىڭ قوعام مۇنداي پروبلەمانى ايتساڭ كەلەكەلەپ، سوگۋگە دايىن تۇرادى. مەنى ءوز ءۇي-ىشىمدەگىلەر دە تۇسىنبەيدى. ۋنيۆەرسيتەتكە تۇسكەنىمدە گرۋپپاداعى ۇلدار «وقتاۋ جۇتىپ العانسىڭ با؟!»، «كەرىككە ۇقسايسىڭ»، «ۇزىنتۇرا» كەكەتىپ وتىراتىن. مەن قانشا ءمان بەرمەۋگە تىرىسسامدا، ىشتەي «كومپلەكس» پايدا بولدى. سول سەبەپتى، ۋنيۆەرسيتەتكە دە بارعىم كەلمەيتىن. كوپ كۇيزەلىسكە ءتۇسىپ، پسيحولوگقا دا بارماق بولدىم. ءبىراق انام مەنىڭ بۇل ويىمنىڭ كۇلكىلى ەكەنىن ايتىپ، جىبەرمەي قويدى»، - دەپ مۇڭىن شاقتى الماتىلىق بويجەتكەن.
ءبىر قىزىعى، اياۋلىمعا كەيبىر قازاق جىگىتتەرى بويىنىڭ ۇزىن بولعانى ءۇشىن عانا ۇيلەنگىسى كەلەتىندەرىن اشىق ايتقان.
«كەيبىر جىگىتتەر: «مەن سەنى بويىڭنىڭ ۇزىن بولعانى ءۇشىن الامىن، ۇرپاعىمنىڭ ءىرى بولعانىن قالايمىن» دەپ توتەسىنەن قويدى. ەندى بويى مەنەن كىشى بولسا دا، جۇرەگىمدى جاۋلاعان جىگىت بولسا، ءبىر اۋلەتتىڭ ۇرپاعىنىڭ ءىرى بولۋىنا ۇلەسىمدى قوسارمىن»، - دەيدى ومىرلىك سەرىگىن ىزدەۋدەن شارشاعان اياۋلىم.
كەيىپكەرىمىز بويى ۇزىن قىزدارعا جىگىت تابۋدان بولەك، كوڭىلىنەن شىعاتىن اياق كيىم تابۋدىڭ دا قيىن ەكەنىن ايتادى.
«بىرەۋ ءۇشىن شىنىمەن كۇلكىلى وقيعا شىعار. ءبىراق اياق-كيىم تابۋ مەن ءۇشىن جىگىت تابۋمەن بىردەي پروبلەما. ماعان ۇنايتىن اياق كيىمنىڭ اياعىما ساي ولشەمى جوق، ولشەمى لايىق اياق كيىم وزىمە ۇنامايدى. كەيدە كافە، تۋعان كۇن كەشتەرىنە بيىك وكشەلى تۋفلي كيگىم كەلەدى، ءبىراق 1.80 سانتيمەتر بويىممەن بيىك وكشە كيۋدىڭ ءوزى ىڭعايسىز. ونىڭ ۇستىنە اياق ولشەمىم 40-بولعان سوڭ، وكشەسىز، جايلى اياق كيىمدەر عانا كيەمىن»، - دەيدى كەيىپكەرىمىز.
كورىكتى دە بويشاڭ اياۋلىمعا مودەلدىك اگەنتتىكتەردەن دە ءتۇرلى ۇسىنىستار تۇسكەن ەكەن.
«ماعان مودەلدىك اگەنتتىكتەرى مودەل بولاسىز با، جارقىن بولاشاق سىيلايمىز، ەۋروپاعا اپارامىز دەپ ۇسىنىستار جاسادى. كوپشىلىگىندە كۋپالنيكپەن سۋرەتكە ءتۇسۋ كەرەك دەگەن سىندى ۇسىنىستار بولعان سوڭ، اكەم قارسىلىق تانىتتى. ءوزىم دە قالامادىم. ودان بولەك ۆولەيبول، باسكەتبول جاتتىقتىرۋشىلارى دا شاقىرىپ جاتادى. دەگەنمەن، ءوزىمنىڭ سپورتقا بەيىمىم بولماعاندىقتان، باس تارتىپ جاتامىن»، - دەيدى ول.
