باتىس قازاقستان وبلىسىندا ەڭ العاشقى جىلقى مۋزەيى اشىلدى
قوشانكول اۋىلىنىڭ بايىرعى تۇرعىنى مەڭدىحان اقساقالدىڭ داستارحانىنان قىسى- جازى قىمىز ۇزىلگەن ەمەس. بۇل ۇيدە جاز بويى جيعان سۋسىن كەلەر جىلدىڭ كوكتەمىنە دەيىن ساقتالادى. بيىل دا 10 بيە بايلانباق. وتاناسى تويعان قىمىزدىڭ پايداسى مەن جاساۋ جولدارى جايلى ساعاتتاپ بايانداۋعا بار.
تويعان احەت، قوشانكول اۋىلىنىڭ تۇرعىنى:
- جىلقىنىڭ ءسۇتى - نەشە ءتۇرلى اۋرۋعا ەم. بيە ساۋعانىمىزعا20 جىل بولدى. نەمەرەلەر ءار ساۋعان سايىن ءبىر- ءبىر كەسە ىشەدى. سوعان ۇيرەنگەن.
جىلقى - قازاقتىڭ جانى، جەتى قازىنانىڭ ءبىرى. وسىنى جاسىنان جادىنا جاتتاعان مەڭدىحان اقساقال اۋىلدا جىلقى مۋزەيىن اشۋ تۋرالى باستاما كوتەرىلگەندە قۋانا قولداپتى. وزگە شارۋا قوجالىقتارىنىڭ جەتەكشىلەرىمەن بىرگە قارجىلاي كومەك بەرىپتى. جاتىرىنا شاپپاس تەكتىلىك، تۋعان جەرىن جاڭىلماي تاۋىپ كەلەر ەستىلىك جىلقىعا عانا ءتان. «سوندىقتان دا ارعىماقتى ارداقتاپ، ونىمدەرىن دارىپتەۋىمىز كەرەك» ، - دەيدى ول.
مەڭدىحان قالىق ۇلى، اۋىلدىق ارداگەرلەر كەڭەسىنىڭ ءتوراعاسى:
- مۇراجايدىڭ نەگىزگى اشىلۋ - ماقساتى قازاقي بولمىستى، قازاقي ءداستۇردى، قازاقي سالتپەن قازىرگى جاستارىمىزدى بەيىمدەۋ. اسقار سۇلەيمەنوۆ دەگەن اقىنىمىز: «باسقا ۇلت، باسقا حالىق مايمىلدان جارالعان بولار. ءبىراق قازاق ۇلتى جىلقىدان جاراتىلعان»، - دەگەن.
مۋزەيدە جىلقىنىڭ تۇرلەرى مەن تەگى تۋرالى مول ماعلۇماتقا قانىعاسىز. وڭىردەن شىققان ايگىلى اتبەگىلەر مەن شاشاسىنا شاڭ جۇقپاس جۇيرىكتەر جايلى دەرەكتەر دە از ەمەس. كونە ات ابزەلدەرىنىڭ دە وزىندىك تاريحى بار.
گۇلناز ايتقاليەۆا، قوشانكول ورتا مەكتەبىنىڭ مۇعالىمى، مۋزەيدى ۇيىمداستىرۋشى:
- جالپى وسى مۇراجايدىڭ اشىلۋى - اۋدان ءۇشىن ۇلكەن ماقتانىش. جانە بۇل رەسپۋبليكادا تۇڭعىش مۇراجاي بولماق. مۇندا قۇندى ەكسپوناتتار وتە كوپ دەۋگە بولادى. سەبەبى تەك قانا ءبىزدىڭ اۋىل تاريحى ەمەس، اۋدان، وبلىس تاريحى ايتىلاتىن بولادى.
مادەنيەت ۇيىندە ورنالاسقان مۇراجايدىڭ ەكىنشى زالىن اشۋ كۇنى بۇگىنگە دەيىن كەيىنگە شەگەرىلىپتى. سەبەبى قارجى تاپشى. مۋزەيدى جابدىقتاۋ جۇمىستارى قازاناتتى قادىرلەيتىن جەرگىلىكتى جۇرتشىلىقتىڭ جاردەمىمەن جۇزەگە اسۋدا.
اۆتورلارى: ە. جىلقايدار ۇلى، ر. عازەزوۆ
khabar.kz/kz/news
