قازاقستاندىق وليمپيادا چەمپيونىنىڭ ىزگى ءىسى جۇرتتىڭ كوڭىلىن بوساتتى
نازيم يۋنۋسوۆ اتتى ينتەرنەت قولدانۋشى Instagram جەلىسىندەگى پاراقشاسىندا راحيموۆتىڭ اۋىر جاعدايدا قالعان ادامعا كومەگى تۋرالى جازعان. "مۇنداي وقيعالاردى ادەتتە ينتەرنەتتەن عانا كورەمىز. سوندىقتان مەن مۇندايعا سەنە بەرمەيتىنمىن. بۇگىنگە دەيىن. بۇگىن نيجاتپەن ءبىراز جوبانى تالقىلاۋعا كەزدەستىك، قاسىمىزعا 45-55 (ونى د دەپ اتايىق) جاس ارالىعىنداعى ادام كەلىپ، قولدان كەلەتىن كومەك بەرۋدى ءوتىندى.
وسى كەزدە داياشى مەن اكىمگەر جۇگىرىپ كەلىپ ول ادامدى قۋا باستادى. نيجات ءبارى دۇرىس ەكەنىن ايتىپ، د- دان اقشا نەگە كەرەكتىگىن سۇرادى. د قارنى اشقانىن ايتتى، نيجات بىردەن تاماققا تاپسىرىس بەردى، ارى قاراي ءبىز د- نىڭ باسىنان وتكەندەرىن تىڭداپ وتىردىق.
ول تابىس تابۋعا كەلگەنىن، الايدا، ونى الداپ، زاتتارى مەن قۇجاتتارىن تارتىپ العانىن ايتتى. ەندى ۇيگە قايتا الماي جۇرگەنىن ايتىپ، كوز جاسىن ءسۇرتتى.
نيجات زەر سالا تىڭداپ، تاماق سۋىماي تۇرىپ ءىشىپ الىڭىز دەگەندى عانا ايتتى. وسى كەزدە وقيعانىڭ ماڭىزدىلىعى مەن نيجاتتىڭ ادامگەرشىلىگىنە تاڭدانىپ وتىردىم. ال نيجات كۇلىپ قانا قويىپ، ەر جىگىتتىڭ باسىنا نە كەلىپ، نە كەتپەيدى دەيسىز دەپ قانا وتىردى"، - دەپ جازدى ول.
ايتۋىنشا، ولار اقىرى وعان جولعا تاماق الىپ، ۆوكزالعا بارعان. "اۆتوبۋسقا وتىرعىزدىق، نيجات ونىڭ جولىنا اقشا مەن ءوز ءنومىرىن بەردى دە، جەتكەندە حابارلاس دەپ، ايتپەسە الاڭدايتىنىن ايتتى. ساتتىلىك تىلەدىك تە قايتتىق. د وزىنە ريو وليمپياداسىنىڭ چەمپيونى كومەكتەسكەنىن بىلمەي دە كەتەتىن شىعار. جازعانىمنىڭ ءبارى شىندىق، جارناما ەمەس، ءار سوزىمە جاۋاپ بەرۋگە دايىنمىن"، - دەپ جازدى قولدانۋشى.
ءبىراق ول بۇل ارەكەتىمەن ماقتانعىسى كەلمەيتىنىن ايتتى. «ال ەڭ باستىسى بۇل پوستپەن ماقتانعىم كەلگەن جوق! ساۋاپ ايتىلماي ىستەلگەن جاقسىلىققا عانا بەرىلەتىنىن بىلەمىن. ءبىراق ءوزىمدى ۇستاي المادىم، بۇل الەمدە جاقسىلىقتىڭ بارىن، نيجات سياقتى ىزگى ادامداردىڭ بارىن جايىپ سالعىم كەلدى. P. S. نيجاتپەن تانسىقانىما كوپ بولعان جوق. مىنا جازعانىم ءۇشىن ۇرساتىنىن بىلەمىن. مەن بۇل وقيعا ارقىلى ادامداردى ىزىگىلىككە شاقىرعىم كەلدى»، - دەپ اسەرىن ءبولىستى ول.
