ەشقاشان حالقىڭنان بيىك بولما - ايتبايەۆتاردىڭ ديماشقا تىلەگى
الەۋمەتتىك جەلى بۇگىن ديماشقا ارنالعان قۇتتىقتاۋلارعا تولى. الەمگە بەلگىلى ونەر جۇلدىزدارى دا قازاق اتىن تانىتقان جاس جىگىتكە ءوز تىلەكتەرىن جەتكىزىپ جاتىر. ءبىراق قاشان دا وتباسىنىڭ ورنى بولەك. بۇگىن ايتبايەۆتار اۋلەتى ءوز بالاسىن ەرەكشە قۇتتىقتاپ، تىلەگى مەن لەبىزىن جەتكىزدى.
«بالا پاتشا، تۋعان كۇنىڭمەن! ونەرىڭمەن بارشا الەمدى تامساندىرىپ، بيىك بەلەستەردەن كورىنە بەر. ەشقاشان اۋىرما، ءومىر جاسىڭ ۇزاق بولسىن. حالىقتىڭ ماڭدايىنا بىتكەن جارىق جۇلدىزى بولىپ جۇرە بەر. ۇلكەنگە قۇرمەت كورسەتىپ، كىشىگە ۇلگى بولا ءبىل. ەشقاشاندا حالقىڭنان بيىك بولما! وتباسىڭنان العان، بويىڭا دارىعان قازاقي تاربيەنى جوعالتپا، ماڭگىلىككە جادىڭدا ۇستاعايسىڭ»، - دەپ جازعان ديماشتىڭ اجەسى ميۋا نيزامۋتدينوۆا.
ديماش اجەسىنە ريزاشىلىعىن ءبىلدىرىپ، ساعىنعانىن جەتكىزگەن. قانات پەن سۆەتا ايتبايەۆتار دا ديماشقا جۇرەكجاردى تىلەكتەرىن جازدى.
«ديماش، سەن ومىرگە كەلگەن مامىراجاي مامىردىڭ شۋاقتى كۇنى، اتا- انامنىڭ «ۇلدى بولدىق!» دەپ شاتتانىپ، ۇلان- اسىر توي جاساعانى، قۋانىش ۇستىندە «بالاپانىم! اتا- انامنىڭ ءالديىسىڭ!
الىپ ۇشقان كوڭىلىمنىڭ ءان- كۇيىسىڭ!
شات كۇلكىمەن ومىرگە قادام باسا عوي!
باقىتىڭنىڭ شەكتەلمەسىن مولشەرى،
جۇرەگىمنىڭ كىپ- كىشكەنتاي بولشەگى!» دەپ ءان ارناعانىم كۇنى كەشەگىدەي كوز الدىمدا... ءبارىمىزدىڭ ماحابباتىمىزعا بولەنىپ ءوستىڭ. اسىرەسە، پاپامىز بەن مامامىزدىڭ وزىڭە دەگەن سەزىمى ەرەكشە بولاتىن! ءالى كۇنگە سولاي. توبەڭنەن قۇس ۇشىرمايدى. مامامىز باسىڭنان سيپاپ وتىرىپ «مەنىڭ قۇلىنىم بويى ۇزىن، ويى بيىك، ارمانى اسقاق، جۇرەگى جۇمساق، مەيىرىمدى ازامات بولىپ وسەدى» دەپ اينالىپ، تولعانۋشى ەدى.
سەن اقىلدى ازامات بوپ ەرجەتتىڭ. ءومىر - بۇرالاڭدى سوقپاقتاردان، داڭعىل جولداردان، جابىسقاق باتپاقتاردان، ءمولدىر ايدىنداردان تۇراتىن كۇردەلى الەم... ءار ادام ومىرگە ءوز تەرەزەسىنەن قارايدى. بىرەۋدىڭ تەرەزەسى كىرشىكسىز تازا. ول الەمنىڭ ءبارىن ادەمى ەتىپ كورەدى، ال ءبىر ادامدار اينالاعا جۋىلماعان كىر تەرەزەسىنەن قارايدى... ومىردە قانداي ادامدى كەزىكتىرسەڭ دە بويىنان جاقسىلىق ىزدەۋگە تىرىس، قۋانىش سىيلاۋعا تىرىس! تەرەزەلەردىڭ تازارۋىنا كومەكتەس... بۇگىن تۋعان كۇنىڭ! وتباسىمىز ءۇشىن قۋانىشتى كۇن. ءومىرىڭ ءماندى دە ءساندى، عۇمىرىڭ ۇزاق، باقىتتى بولسىن، ديكونىم! اعاتايىڭ»، - دەپ جازدى قانات ايتبايەۆ.
ءوز قۇتتىقتاۋىن سۆەتا ايتبايەۆا دا جەتكىزگەن. ول: «ديكونتايىم! تۋعان كۇنىڭ قۇتتى بولسىن! ەڭ باستىسى، امان ءجۇر، عۇمىرلى بول! ءبىزدىڭ وتباسىمىزدى، اعايىندى، دوس- جاراندى عانا قۋانتىپ دۇنيەگە كەلىپ ەدىڭ، شۇكىر، بۇگىندە ءدۇيىم جۇرتتى، بۇكىل ەلدى قۋانتىپ ءجۇرسىڭ. وسى بەتىڭنەن تايما! ءبىز ءۇشىن، ارتىڭنان ەرگەن قوس باۋىرىڭ ءۇشىن سەنىڭ ورنىڭ ەرەكشە. ءبىز سەنى جاقسى كورەمىز! ارمانشىل بالاپان، بارلىق ارماندارىڭ ورىندالسىن»، - دەپ جازدى.
ديماشتىڭ قارىنداسى راۋشان قۇدايبەرگەن دە ءوز لەبىزىن ءبىلدىردى.
«بۇگىن الەمدەگى ەڭ كۇشتى اعانىڭ، اتا مەن اجە، پاپا مەن ماما ءۇشىن جاقسى بالانىڭ، جانكۇيەرلەرى ءۇشىن ەڭ كەرەمەت ءانشىنىڭ تۋعان كۇنى. كوكە، تۋعان كۇنىڭ قۇتتى بولسىن! جۇزىڭنەن ەشقاشان كۇلكى كەتپەي، قۋانىشتى كۇندەرىڭ كوپ كەزدەسسىن. ەشقاشان اۋىرماي، بارشا حالىقتى ءوز ونەرىڭمەن تامساندىرا بەر»، - دەپ جازدى ول.
اۆتور: التىناي ساعىندىقوۆا
