ۇكىمەتكە پرەزيدەنتتىڭ قانداي وكىلەتتىكتەرى بەرىلەدى؟
«ەلباسى ارنايى ۇندەۋىندە مەملەكەتتىك بيلىكتىڭ تارماقتارى اراسىندا پرەزيدەنتتىڭ زاڭ دەڭگەيىندە بەكىتىلگەن كەيبىر وكىلەتتىكتەرىن قايتا ءبولۋ تۋرالى تاپسىرما بەرگەن. ەلباسىنىڭ وكىمىمەن قۇرىلعان ارنايى جۇمىس توبى قايتا بولۋگە جاتاتىن وكىلەتتىكتەردى انىقتادى. ولار - الەۋمەتتىك-ەكونوميكالىق سالالاردى رەتتەيتىن پرەزيدەنتتىك وكىلەتتىكتەر. ادىلەت مينيسترلىگى ءوز كەزەگىندە ءتيىستى زاڭ جوباسىن ازىرلەدى. بۇل زاڭ جوباسىمەن 4 كودەكسكە جانە 22 زاڭعا وزگەرتۋلەر مەن تولىقتىرۋلار ەنگىزۋ كوزدەلەدى»، - دەدى «ق ر- نىڭ كەيبىر زاڭنامالىق اكتىلەرىنە مەملەكەتتىك بيلىك تارماقتارى اراسىندا وكىلەتتىكتەردى قايتا ءبولۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» ق ر زاڭىنىڭ جوباسىن تانىستىرعان ەلىمىزدىڭ ادىلەت ءمينيسترى مارات بەكەتايەۆ.
ءمينيستردىڭ ايتۋىنشا، ۇسىنىلىپ وتىرعان تۇزەتۋلەر 3 باعىتتى قامتيدى.
ءبىرىنشى باعىت بويىنشا ۇكىمەتكە پرەزيدەنتتىڭ ەكونوميكالىق ۇدەرىستەردى رەتتەۋ سالاسىنداعى كەلەسى وكىلەتتىكتەرىن بەرۋ ۇسىنىلادى: يندۋستريالىق-يننوۆاتسيالىق قىزمەتتى قولداۋ سالاسىنداعى ەكونوميكانىڭ باسىم سەكتورلارىن ايقىنداۋ؛ ارنايى ەكونوميكالىق ايماقتاردى قۇرۋ؛ ۇلتتىق بانك پەن ءتيىستى ۋاكىلەتتى ورگانداردىڭ بىرلەسكەن ۇسىنىسى نەگىزىندە ارنايى ۆاليۋتالىق رەجيمدى ەنگىزۋ؛ مەملەكەتتىك-جەكەشەلىك ارىپتەستىك ماقساتتارىنا بەرىلمەيتىن وبەكتىلەر تىزبەسىن ايقىنداۋ.
«زاڭ جوباسىنا سايكەس تەڭىزدە، ىشكى سۋ ايدىندارىندا، توتەنشە ەكولوگيالىق جاعداي ايماقتارىندا جانە ەرەكشە قورعالاتىن تابيعي اۋماقتاردا مۇناي وپەراتسيالارىن جۇرگىزۋ مۇمكىندىكتەرى تۋرالى شەشىمدى ەندى ۇكىمەت ءوزى قابىلدايتىن بولادى. سونىمەن قاتار، پرەزيدەنتتىڭ جانە پرەزيدەنت اكىمشىلىگىنىڭ كەلىسىمىمەن جۇزەگە اسىرىلاتىن كەلەسى وكىلەتتىكتەردى بەرۋ ۇسىنىلىپ وتىر: مەملەكەتتىك جوسپارلاۋ جۇيەسىن انىقتاۋ؛ جەكە كاسىپكەرلىك سۋبەكتىلەرىن تەكسەرۋدى بەلگىلى ءبىر مەرزىمگە توقتاتا تۇرۋ تۋرالى شەشىم قابىلداۋ؛ مەملەكەتتىك ورگان تۋرالى ۇلگىلىك ەرەجەنى بەكىتۋ؛ مەنشىكتەن شىعارۋعا جاتپايتىن مەملەكەتتىڭ جانە كۆازيمەملەكەتتىك سەكتور سۋبەكتىلەرىنىڭ مەنشىگىندەگى وبەكتىلەردىڭ ءتىزىمىن بەكىتۋ»، - دەدى مينيستر.
ەكىنشى باعىت پرەزيدەنتتىڭ الەۋمەتتىك ماڭىزى بار كەيبىر وكىلەتتىكتەرىن بەرۋدى كوزدەيدى. مىسالى، «قازاقستان رەسپۋبليكاسىنداعى مەرەكەلەر تۋرالى» زاڭىندا مەرەكەلىك كۇندەر تىزبەسىن بەكىتۋ وكىلەتتىگىن ۇكىمەتكە جۇكتەۋ قاراستىرىلادى.
بۇدان باسقا، مەملەكەتتىك قىزمەتشىلەرگە بونۋستار تولەۋ، ماتەريالدىق كومەك كورسەتۋ، ۇستەمەاقىلار بەلگىلەۋ ءتارتىبىن ايقىنداۋ وكىلەتتىكتەرىن پرەزيدەنت اكىمشىلىگىنىڭ كەلىسىمى بويىنشا ۇكىمەتكە بەرۋ ۇسىنىلادى. سونىمەن بىرگە، زاڭ جوباسى قايىرىمدىلىقتى ىنتالاندىرۋ ماقساتىندا قولدانىلاتىن قايىرىمدىلىق سۋبەكتىلەرىنە قۇرمەتتى اتاقتاردى بەلگىلەۋ جانە بەرۋ ءتارتىبىن ۇكىمەتتىڭ بەكىتۋىن كوزدەيدى.
«ءۇشىنشى باعىت پرەزيدەنتتىڭ كەيبىر ۇيىمداستىرۋشىلىق سيپاتتاعى وكىلەتتىكتەرىن بەرۋدى كوزدەيدى. وسىلايشا، ۇكىمەتكە وبلىستار مەن رەسپۋبليكالىق ماڭىزى بار قالالاردىڭ شەكارالارىن انىقتاۋ، ايرىقشا ستراتەگيالىق ماڭىزى بار سۋ شارۋاشىلىعى قۇرىلىستارىنىڭ ءتىزىمىن انىقتاۋ جانە تاعى باسقا وكىلەتتىكتەردى بەرۋ جوسپارلانۋدا. سىبايلاس جەمقورلىققا قارسى ۋاكىلەتتى ورگان جۇزەگە اسىراتىن سىبايلاس جەمقورلىق تاۋەكەلدەرىن سىرتقى تالداۋ ءتارتىبىن پرەزيدەنتتىڭ اكىمشىلىگىمەن كەلىسۋ بويىنشا ايقىنداۋ وكىلەتتىگى ۇكىمەتكە بەرىلىپ وتىر. سونداي-اق، ۇكىمەتكە پرەزيدەنت اكىمشىلىگىنىڭ كەلىسىمى بويىنشا مەملەكەتتىك قىزمەتشىلەردى مەملەكەتتىك ورگاندارعا، شەتەلدەگى مەكەمەلەرگە جانە وزگە دە ۇيىمدارعا ءىس ساپارعا جىبەرۋ ءتارتىبىن بەكىتۋ تۋرالى وكىلەتتىكتى بەرۋ ۇسىنىلادى.
بۇدان باسقا، زاڭ جوباسى پرەزيدەنتتىڭ شەتەلدىك قىزمەتكەرلەردى جۇمىسقا الۋ كەزىندە مىندەتتى ارنايى تەكسەرۋدەن وتكىزۋ ءتارتىبىن انىقتاۋ وكىلەتتىگىن مەملەكەتتىك قىزمەت ىستەرى جونىندەگى ۋاكىلەتتى ورگانمەن بىرلەسىپ ۇلتتىق قاۋىپسىزدىك كوميتەتىنە بەرۋدى كوزدەيدى»، - دەدى بەكەتايەۆ.
اۆتور: مارلان جيەمباي
