شەكاراشىلار جالعان تولقۇجاتپەن جۇرگەن اۋعانستان ازاماتتارىن ۇستادى
استانا. قازاقپارات - قازاقستاندىق شەكاراشىلار زاڭسىز تولقۇجاتپەن جۇرگەن وتباسى مۇشەلەرىن ۇستادى. ۇستالعان ۇشەۋ اۋعانستان ازاماتتارى بولىپ شىقتى، دەپ حابارلايدى ق ر ۇ ق ق- ءنىڭ شەكارا قىزمەتى.
وتباسى مۇشەلەرى ۋكراينا ارقىلى ۆەناعا جەتپەك بولعان. «الماتى» وتكىزۋ بەكەتىنىڭ ناريادى «الماتى- كيەۆ» رەيسىن راسىمدەۋ جۇمىستارى بارىسىندا ۇلى بريتانيا ازاماتىنىڭ تولقۇجاتىمەن جۇرگەن اۋعانستان ازاماتىن ۇستاعان. ونىڭ قۇجاتىنىڭ قولدان جاسالعاندىعىن اشكەرەلەتىن بەلگىلەر انىقتالدى. ارنايى جۇرگىزىلگەن جان- جاقتى تەكسەرۋ بارىسىندا ءۇش ءتولقۇجاتتىڭ جانە تەكسەرۋگە بەرىلگەن بالالاردىڭ قۇجاتتارىنىڭ يەلەرىنە تيەسىلى ەمەس ەكەندىگى جانە ولاردىڭ جالعان ەكەندىگىن ناقتىلايتىن بەلگىلەر انىقتالدى. وسى ماسەلە جونىندە ءتيىستى ورگاندارعا حابارلاندى. قۇجاتتار تاركىلەندى.
