استانا اۆتوبۋستارىنداعى كوندۋكتورلار جۇمىسسىز قالۋى مۇمكىن

استانا. قازاقپارات - استانا بيلىگى قالا اۆتوبۋستارىنداعى كوندۋكتورلار قىزمەتىنەن بىرتىندەپ باس تارتۋدى جوسپارلاۋدا، دەپ حابارلايدى «قازاقپارات» ح ا ا ءتىلشىسى.

«مۇمكىن جاز سوڭىنا دەيىن Shuttle bus-تان باستاپ، كوندۋكتورلاردان مۇلدەم باس تارتامىز. تەك shuttle bus-تاعى ەمەس، بارلىق اۆتوبۋستاعى كوندۋكتورلار قىزمەتىنەن الشاقتاۋ جوسپاردا بار»، - دەدى استانا قالالىق جولاۋشىلار كولىگى باسقارماسىنىڭ باسشىسى بەكمىرزا يگەنبەردينوۆ باسپا ءسوز ءماسليحاتى بارىسىندا.

ول جولدارداعى كولىك كەپتەلىسىن ازايتۋ ءۇشىن اكىمدىك جۇرگىزىپ جاتقان شارالار مەن قالا تۇرعىندارىنىڭ جۇمىس كەستەلەرىن وزگەرتۋ تۋرالى پىكىر ءبىلدىردى. «قاربالاس ۋاقىتتاعى كەپتەلىستىڭ قانشالىقتى ازاياتىنىن كورەمىز. بۇل ارينە، اۆتوبۋستارداعى ادام تىعىزدىعىنا دا اسەر ەتەدى. ونىڭ ۇستىنە جاڭادان قوسىمشا اۆتوبۋستاردىڭ ساتىپ الىنۋى تاڭعى 8 دەگى جۇكتەمەنى ازايتۋعا مۇمكىندىك بەرەدى. دەمەك، ءبىز جولاۋشىلاردى اۆتوبۋستىڭ الدىڭعى ەسىگىنەن كىرگىزىپ، سوڭعى ەسىگىنەن شىعارا الامىز. وندا بىزگە كوندۋكتوردىڭ ەش قاجەتى بولمايدى. موبيلدى ۆاليداتورلار جۇرگىزۋشىنىڭ جانىنا ورناتىلادى»، - دەپ ءتۇسىندىردى ب. يگەنبەرديەۆ. ونىڭ ايتۋىنشا، تامىز ايىندا استانانىڭ بارلىق اۆتوبۋستارى جولاقىنى ەلەكتروندى تولەۋ جۇيەسىمەن قامتاماسىز ەتىلەدى. بۇل جۇيەنى كوتەرمەيتىن ەسكى اۆتوبۋستار موبيلدى ۆاليداتورلارمەن جابدىقتالادى.

اۆتور: ايجان سەرىكجان قىزى