پاۆلوداردا قازاق ءتىلى ادىسكەرى كيىز ءۇيدىڭ ىشىندە ءتىل ۇيرەتەدى - ۆيدەو
«ءتىل كەرۋەنى» جوباسىنىڭ ماقساتى - قازاق ءتىلىن ۇيرەتۋ عانا ەمەس، سونىمەن قاتار، ۇلتتىق سالت- داستۇرمەن تانىستىرۋ جانە مۋزەي، تەاتر سىندى تاريحي ورىنداردا ءتۇرلى مادەني شارالار ۇيىمداستىرۋ. قازاقتىڭ داستارقانىندا ەجەلدەن بەرى ورىن الىپ كەلگەن باۋىرساق، قۇرت، قوسپا سەكىلدى ۇلتتىق تاعامدار دا ناسيحاتتالادى. تىڭداۋشىلاردىڭ بارلىعى مەملەكەتتىك تىلدە ەركىن سويلەپ كەتپەسە دە، وڭ اسەر الادى دەگەن ويدامىز»، - دەيدى وبلىستىق «انا ءتىلى» ورتالىعىنىڭ ديرەكتورى شولپان كەنجەكوۆا.
اتالعان جوبا وتكەن جىلى اقسۋ قالاسىنا قاراستى قۇركول اۋىلىندا باستالىپ، ەكى كيىز ءۇي قۇرىلعان. وسىنداي ادىسپەن جەتى اۋداننىڭ تۇرعىندارىنا انا ءتىلىن ۇيرەتكەن. جوبانىڭ قورىتىندى كونتسەرتى باياناۋىل اۋدانى تورايعىر اۋىلىندا بولدى. وعان 70 ادام قاتىسىپ، باياناۋىلدىڭ تاريحي ولكەتانۋ مۋزەيىنە ەكسكۋرسيا جاسادى. ال، بيىلعى جىلعى ەرەكشە جايلاۋ پاۆلودار قالالىق ساياباعىنان ورىن الدى. «ءتىل كەرۋەننىڭ» ءاربىر قاتىسۋشىسى ادىستەمەلىك كەشەن مەن فلەش- ترەنينگىن الدى. ادىستەمەلىك جوباسى 50 ساعاتقا ارنالعان.
«جالپى «ءتىل كەرۋەنىنە» قاتىسۋشىلاردىڭ جاسىنا شەك قويىلمايدى. ويتكەنى ءتىل مەن مادەنيەت جاسقا قارامايدى عوي. سونداي-اق ءتىلدى ۇيرەنگىسى كەلەتىندەرگە كۇندەلىكتى ومىردەگى تۇرمىستىق جاعدايعا بەيىمدەپ، بىرتە- بىرتە ءسىڭىرۋ قاجەت»، - دەيدى ادىسكەر.
