سەزىمنىڭ وشكەنىن مىنادان بىلەسىز

استانا. قازاقپارات - ماحاببات كوزدەن عايىپ بولسا، كىم كىنالى؟ ەرىن سىيلاي الماعان نازىك جاندى ما، الدە ءتوزىمسىز ەر مە؟

اركىم ءوز كوزقاراسىن دۇرىس دەپ ەسەپتەيدى. ەسىڭىزدە بولسىن، كىنا ەشقاشان ءبىر تاراپتان بولمايدى..  

ءبىر-ءبىرىن ىزدەمەيدى

ءبىر كورمەسە تۇرا المايتىن جاندار ءسال كەشىكسە نە بولماسا ءتۇرلى سىلتاۋمەن كەلە المايتىنىن ايتسا، كۇدىك تۋادى. العاشقى ساتتە تۇسىنىستىك تانىتىپ، «شىندىعىندا دا بوساماي جاتقان بولار» دەپ ءپىشىپ قويادى. ال كەيىنگىلەرى شە؟ «كوزدەن كەتكەن سوڭ، كوڭىلدەن كەتەدىگە» سالىنىپ، ارا دا سۋيدى.

«كەزدەسپەگەنىمىزگە نەشە كۇن بولدى؟» دەگەن اڭگىمەنىڭ ارتى جاقسىلىققا اپارمايدى. مۇنداي جاعدايدا اڭگىمەنىڭ اشىعىن ايتىپ، كىمنىڭ كوڭىلى سۋىعانىن، وعان نە تۇرتكى بولعانىن ءتۇسىندىرىپ، «اقىلدى» ادامدارشا سويلەسكەن ابزال.

ءبىر-ءبىرىن ىزدەمەيتىن ادامداردىڭ ءبىر-ءبىرىن تەككە ۇستاپ جۇرگەنى -  بەكەر.

مىنەز كورسەتەدى

ۇيقىنىڭ قانباۋى، جۇمىستاعى ساتسىزدىك، اينالاداعى ادامداردىڭ جاعىمسىز سىنى پسيحولوگيالىق دەنساۋلىققا اسەر ەتپەي قويمايدى. ىشتەگى اگرەسسيانى تىسقا شىعارامىن دەپ ءجۇرىپ، سۇيىكتىسىنە سەس كورسەتىپ قالاتىندار بار. «تاز اشۋىن تىرنادان الادى». سىڭارىنىڭ قولداۋىنا كوز جۇما قاراپ، اتالعان قيىندىقتاردى ارزان ويىن-ساۋىقپەن جەڭەمىن دەگەننىڭ ماحابباتى ۇزاققا سوزىلماسى انىق.

ەگەر ءسىزدىڭ تاراپتان بارلىق قولداۋ-كومەك كورسەتىلىپ، ودان جىلى جاۋاپ قايتپاسا، ءوزى ءبىلسىن. ول ءسىزدىڭ قولداۋىڭىزعا مۇقتاج ەمەس ەكەن، جان راحاتىن جامان ادەتتەردەن (شىلىم شەگۋ، ىشىمدىك ءىشۋ) السا، ونداي ادامدى ۇستاپ تۇرۋدىڭ دا قاجەتى شامالى.

ماحابباتتان قۋانىش الا المايدى

عاشىقتار ماحابباتتان قۋانىش، ءلاززات، سىيلاستىق الۋ كەرەك. ەگەر مۇنداي سەزىمدەر قورقىنىش، كۇيزەلىس، وكىنىش، سەنىمسىزدىك، ۋايىم، جۇيكەنىڭ توزۋى سەكىلدى جاعىمسىزدارمەن الماسسا، ولار ۋاقىت وتە عاشىقتار تىزىمىنەن سىزىلا باستايدى. ءبىر-بىرىنە اق ادال سەزىم، لايلانباعان ماحاببات سىيلاي الماسا نەمەسە ءبىرىنىڭ اۋىرىپ جاتقانى ەكىنشىسىن اسا قىزىقتىرماسا، مۇنى ماحاببات دەۋ -  بوس اۋرە.

بىرگە ماقسات قۇرىلمايدى

«باس ەكەۋ بولماي، مال ەكەۋ بولمايدى». بىرگە جۇرگەندە عانا ءىس وڭالادى، ماسەلە، ۋايىم تەڭ بولىنەدى. ال «اققۋ، شورتان ءھام شايان» بولىپ ەكەۋى ەكى جاققا تارتسا، اڭگىمە بولەك.

بۇل جەردە قازىرگى كەزدە كوپ ادامنىڭ كوركىن وشىرەتىن «ءبىر قاعيدامەن ءجۇرۋ» دەگەن تۇسىنىككە ءمان بەرۋ كەرەك.

ءبىرىنىڭ ويىن ءبىرى قولداماي نەمەسە ءبىر ەكىنشىسىنىڭ قاتەلىكتەرىن تۇزەپ وتىرسا، ول وزىنىكىن دۇرىس دەپ وتىرسا، جاعداي قيىن. عاشىقتار بولاشاققا ءبىر كوزبەن قاراۋى ءتيىس. ءبىر ماقسات، ءبىر وتباسى، ءبىر ماحاببات. وسى ءۇش تاعاندى بەرىك ۇستاسا، سەزىم ويانادى.

جالعىزدىقتان راحات الادى

ادام كەنەت ءوز كەڭىستىگىنە ەشكىمدى كىرگىزبەي، بولەكتەنىپ السا، كۇدىك تۋادى. بىرگە جۇرگەنگە قاراعاندا وقشاۋ جۇرگەندى، بىرگە قىدىرعانعا قاراعاندا بولەك قىدىرعاندى ۇناتاتىن ەكەۋدىڭ ايتارعا اڭگىمەسى تاۋسىلعان. الەمنىڭ ادەمىلىگىن بىرگە كورىپ، قۋانىشتى ەكى ەسەلەگەن ارتىق ەمەس پە؟ «جالعىزدىڭ اتى، جاياۋدىڭ شاڭى شىقپايدى». جالعىزدىقتا ءجۇرۋ قۇلاي سۇيگەن ەكى جاسقا ءتان ەمەس.

Massaget.kz