ستۋدەنتكە كاسىپ ۇيرەتكەن تالىمگەرگە ۇستەمەاقى تولەنەتىن بولادى
بۇل تۋرالى ق ر پارلامەنتى ماجىلىسىندە ءبىلىم جانە عىلىم ۆيتسە-ءمينيسترى بيبىگۇل اسىلوۆا ءمالىم ەتتى، دەپ حابارلايدى قازاقپارات.
قازاقستاندا دۋالدى ءبىلىم بەرۋ باعىتىندا بارلىق قاجەتتى جاعدايلار جاسالعانىنا توقتالعان ۆيتسە- مينيستر، بۇگىندە وسى ءبىلىم بەرۋ جۇيەسى 2-3 -كۋرستاردا وقىتۋ باعدارلاماسىنىڭ وندىرىستە 60 پايىزعا جۋىق دەڭگەيىن قۇراپ وتىرعاندىعىن اتاپ ءوتتى.
«قازىرگى كەزدە بىزدە وسى باعدارلامامەن 2400 كاسىپورىن جۇمىس ىستەپ جاتىر، 440 كوللەدج دۋالدى وقىتۋعا جۇمىلدىرىلعان. ماڭىزدى ماسەلەنىڭ ءبىرى - ول دۋالدى ءبىلىم بەرۋدەگى شىعىستاردى قارجىلاندىرۋعا قاتىستى. بۇگىندە ءبىلىم جانە عىلىم مينيسترلىگىمەن تەحنيكالىق جانە كاسىپتىك ءبىلىم بەرۋ ۇيىمدارىندا جان باسىنا قارجىلاندىرۋ ادىستەمەسى ازىرلەنۋدە. اتالعان ادىستەمە اياسىندا قاناتقاقتى رەجىمدە پىسىقتاماقپىز»، - دەپ توقتالدى ب. اسىلوۆا «نۇر وتان» پارتياسى سايلاۋالدى باعدارلاماسىنىڭ «ءبىلىم» باعىتى بويىنشا كوميسسياسىنىڭ «تەحنيكالىق جانە كاسىپتىك ءبىلىم بەرۋ ۇيىمدارىندا دۋالدى وقىتۋدى ەنگىزۋ» تاقىرىبىنداعى وتىرىستىڭ بارىسىندا.
وسى ورايدا ول شىعىنداردىڭ نەگىزىندە تالىمگەر ۇستازدىڭ ەڭبەكاقىسى ەسكەرىلگەنىن اتاپ ءوتتى. اتاپ ايتقاندا، دۋالدى وقىتۋ ءۇشىن جۇمىس ورىندارىن قۇرۋ مەن تاجىريبەنى قامتاماسىز ەتۋ كاسىپورىننىڭ وزىنە بەكىتىلگەن. ۆيتسە- مينيستر جۇيە اياسىندا ءبىر ستۋدەنتتى وقىتۋدىڭ شىعىستارى ورتاشا ەسەپپەن العاندا جىلىنا 360 مىڭ تەڭگە قۇرايتىنىن ايتا كەلە: «ناتيجەلى جۇمىسپەن قامتۋ باعدارلاماسى بويىنشا بىلىكتىلىكتى ارتتىرۋ كۋرستارىندا تالىمگەر ۇستازداردىڭ ەڭبەكاقىسىن تولەۋگە شىعىستاردى ەسكەردىك.
وسى ورايدا قايتا دايارلاۋ كۋرستارىندا دايارلىقتان وتكىزۋگە 44 مىڭ تەڭگە قاراستىرىلدى. ويتكەنى كاسىپورىندا جۇمىس ىستەيتىن ادامعا قوسىمشا جۇكتەمە تۇسەتىنى بەلگىلى. بۇل باعىتتا تالىمگەر ۇستاز ستۋدەنتتى وقىتۋعا ءوزىنىڭ ۋاقىتىن ءبولۋى ءتيىس بولادى. سوندىقتان ءبىز جۇمىس بەرۋشىلەر مەن تالىمگەردى ىنتالاندىرۋعا نيەتتىمىز»، - دەدى.
وسى رەتتە تالىمگەر ۇستازدىڭ ەڭبەكاقىسىنا قوسىمشا 44 مىڭ تەڭگە قوسىلادى. ناتيجەلى جۇمىسپەن قامتۋ باعدارلاماسى اياسىندا بۇل ماقساتتا مەملەكەت ەسەبىنەن 70 ميلليون تەڭگەگە تارتا قارجى قاراستىرىلعان.
