بيىل جازدا قايدا دەمالۋعا بولادى؟
استانا. قازاقپارات - دەمالىس ورىندارىن تاڭداۋ، اسىعا كۇتكەن ساياحاتتى كوڭىلدەن شىعاتىنداي ەتىپ ۇيىمداستىرۋ تۋرالى «گەليوس» تۋريستىك كومپانياسىنىڭ باس ديرەكتورى ايگۇل ءساتجان Sputnik قازاقستان اگەنتتىگىنە بەرگەن سۇحباتىندا ايتىپ بەردى.
ءبارىمىز اسىعا كۇتكەن جازعى تۋريستىك ماۋسىمنىڭ باستالۋىنا از عانا ۋاقىت قالدى. تۋريستىك كومپانيالار مەن وپەراتورلار ساقاداي ساي، ال قازاقستاندىقتار جازعى دەمالىسىن قازىردەن باستاپ ويلاستىرۋدا. بۇگىندە ساياحات باعىتى مەن دەمالىس ءتۇرىن تاڭداۋعا كوپتەگەن فاكتورلار اسەر ەتەدى. جانە، ءبىر قىزىعى، بۇل جەردە بارىنەن دە ساياسي احۋال ماڭىزدى، ول تۋريستەردى جىبەرەتىن دە، قابىلدايتىن دا ەلدەردىڭ ەكونوميكالىق كليماتىن قالىپتاستىرادى.
دەمالىسقا اتتانباس بۇرىن، اسىرەسە، بۇكىل وتباسىمىزبەن جينالعاندا، بىرنەشە جايتتاردى ەسكەرەمىز - قاۋىپسىزدىك، قىزمەت كورسەتۋ ساپاسى، قولايلىلىق، وڭىردەگى سانيتارلىق احۋال جانە ءوز بيۋدجەتىمىز.
- تۋريستىك ماۋسىم باستالعالى تۇر، ءبارى تەڭىز جاعاسىنا اتتانىپ، كۇندەلىكتى تىرشىلىكتىڭ كۇيبەڭىن ارتقا تاستاعىسى كەلەدى. بۇل كەزەڭ تۋريستىك كومپانيالار ءۇشىن ەڭ ءتيىمدى ۋاقىت پا؟
- ءيا، جازعى ماۋسىم - دەمالىستارعا ارنالعان ەڭ ۇزاق كەزەڭ. دەگەنمەن تۋريستەر جىل بويى بەلسەندىلىكتەرىن جوعالتپايدى، ويتكەنى قازىر دە كليماتى ىستىق ەلدەر وتە كوپ، جىل بويى جۇمىسپەن قامتىلعانبىز. ال جازدا وتباسىلىق دەمالىس ءبىرىنشى ورىندا تۇرادى، مۇنىڭ ءوز ەرەكشەلىكتەرى بار: قولايلى قوناق ءۇي، قولايلى ەل، ويىن- ساۋىق.
- قولايلى ەل تۋرالى ايتايىقشى. قازىر قاي ەلدەرگە ساياحاتتاعان ءجون دەپ ويلايسىز؟ حالىقتىڭ جۇرەگىن جاۋلاپ العان تۇركيا ەلى ءبىرىنشى ورىندا ما؟
- تۇركيا دەمەكشى. شىنى كەرەك، تۇركيانىڭ باسەكەلەستەرى بۇرىنعىداي از. اسىرەسە، بىلتىرعى جىلى سانكسيا شىعىپ، رەسەيمەن قارىم- قاتىناسى توقتاعاننان كەيىن احۋال مۇلدەم وزگەردى. بۇل جايت ەلگە جاڭا سەرپىن بەرىپ، ولار رەسەيلىك تۋريستەردىڭ قالىڭ توبىن ساعىنىپ قالدى، سول سەبەپتى ءقازىر دەمالۋشىلار ءۇشىن كوپتەگەن ارتىقشىلىقتار بار. ءبىرشاما كليەنتتەرىمىز تۇركياعا بارعىسى كەلەدى - ولاردىڭ اراسىندا اقشاسىن ۇنەمدەگىسى كەلەتىندەر، دۇنيە ءجۇزىن تالاي ارالاعاندار دا بار.
- قاۋىپسىزدىك جاعى قالاي؟ بىرنەشە مارتە تەراكت بولعاننان كەيىن، تۇركياعا كوپ ەشكىم بارعىسى كەلمەيدى ەمەس پە؟
- ءوزىم دە سوندا بارىپ دەمالامىن، دوستارىم مەن تۋىستارىم دا بارادى، تۇركيادان باس تارتپاعان كليەنتتەر دە تولىپ جاتىر. اقشا جاعىنان ءتيىمدى، بارلىق جاعداي جاسالعان ءارى قاۋىپسىز.
- قازاقستاندىقتار اراسىندا تاعى قانداي باعىتتار كەڭ تاراعان؟
- بۇكىل ەلدەرگە سۇرانىس بار - جازدا ەۋروپا مەن ازياعا، جاڭاعى ايتقان تۇركياعا بارعىسى كەلەدى، ءبىراق، البەتتە، قارجى ماسەلەسى ەسكەرىلەدى. ماسەلەن، بىزگە بىلتىرعى جىلى دەمالىسقا 10 مىڭ دوللار جۇمساعان كليەنتتەر كەلەدى. ال بيىل تۋرا سول باعىتتى ءتيىمدى سوماعا، باسقا شارتتارمەن تاڭدايدى. كەيبىر كليەنتتەردىڭ سۇراۋى كوپ، ءبىراق قاراجاتى شەكتەۋلى. ءبىز ءبارىنىڭ ءتىلىن تاۋىپ، كومەكتەسۋگە تىرىسامىز. ءبىر ماملەگە كەلەمىز.
- ال ەگەر بيۋدجەت جاعى شەكتەۋلى بولسا، وزىمىزگە كورشى ورنالاسقان ەلدەرگە بارۋعا بولا ما؟ مىسالى، قىرعىزستانعا؟
- ارينە، بولادى. ءبىراق بۇل جەردە دە ءبىر ماسەلە بار. بىرىنشىدەن، كەي ادامدار مۇنداي ءتيىمدى ۇسىنىستارعا قارامايدى. ەكىنشىدەن، ادام شىعىن شىعارىپ، دەمالىسقا بارعاسىن، شەتەلگە، تەڭىز جاعاسىندا بولعىسى كەلەدى. قىرعىزستاندا كەرەمەت دەمالعانشا، ورتاشا دەڭگەيدە بولسا دا تۇركياعا بارىپ قايتسام دەيدى.
- ال ۆيزا ماسەلەسىن قالاي رەتتەيسىزدەر؟ بۇل قازاقستاندىقتار ءۇشىن قيىندىق تۋعىزباي ما؟
- ەشقانداي قيىندىق جوق. مۇنىڭ بارىمەن اگەنتتىك اينالىسادى. كەيدە تۋريستەردىڭ وزدەرى- اق رەسىمدەپ الادى. ماسەلەن، كەيدە ۆيزانى ءبىز جاساپ، قوناق ءۇيدى وزدەرى بروندايدى، ءبىراق بۇل ءارقاشان ءتيىمدى ەمەس.
- بيىل قازاقستان ەكسپو-2017 كورمەسىن قابىلدايدى، دەمەك ەلىمىزدە تۋريزم سالاسى دامي تۇسەدى عوي؟
- ءيا، ەكسپو وتە ەلەۋلى، ايتۋلى وقيعالاردىڭ ءبىرى، ەلىمىزدىڭ تۋريزم سالاسىنا جاڭا سەرپىن بەرەدى، جاڭا مۇمكىندىكتەر پايدا بولادى. استانا اۋەجايىندا «اشىق اسپان» رەجيمىنىڭ ەنگىزىلەتىنىن ەسكەرسەك، كورمە قارساڭىندا ەلىمىزگە كوپتەگەن تۋريست كەلەتىنى انىق. شەتەلدىكتەرگە قازاقستان قاتتى ۇنايدى، سول سەبەپتى بۇل جايت سالانىڭ دامۋىنا ەرەكشە قارقىن بەرەدى دەپ ويلايمىن.
Stan.kz
