قازاقستان ك ح د ر- دىڭ زىمىران ۇشىرۋىن ايىپتادى
بۇل تۋرالى ق ر سىرتقى ىستەر مينيسترلىگى باسپا ءسوز قىزمەتىنىڭ جەتەكشىسى ءانۋار جايناقوۆ «قازاقپارات» ح ا ا ءتىلشىسىنىڭ ساۋالىنا جاۋاپ بەرە وتىرىپ حابارلادى.
«اتالعان ارەكەت ب ۇ ۇ قاۋىپسىزدىك كەڭەسىنىڭ 1718 (2006 -جىلعى)، 1874 (2009)، 2087 (2013)، 2094 (2013) جانە 2270 (2016) قارارلارىن ورەسكەل بۇزۋ بولىپ تابىلادى. قازاقستان ايماقتىق، جاھاندىق قاۋىپسىزدىككە قاتەر ءتوندىرىپ، حالىقارالىق قاۋىمداستىقتىڭ يادرولىق قارۋسىز بولاشاقتى قامتاماسىز ەتۋگە سالعان كۇش- جىگەرىنە نۇقسان كەلتىرەتىن جاۋاپسىز ارەكەتتەرگە جول بەرمەۋ قاجەتتىگىن مالىمدەيدى»، - دەدى جايناقوۆ.
ول قازاقستاننىڭ ك ح د ر- دى تاعى دا اسكەري جانە يادرولىق باعدارلامالارىنان باس تارتۋعا، ب ۇ ۇ قك قارارلارىن ۇستانۋعا جانە كوپجاقتى كەلىسسوزدەر پروتسەسىن قايتا جانداندىرۋعا شاقىراتىنىن اتاپ ءوتتى.
بۇعان دەيىن حابارلانعانداي، ك ح د ر كەزەكتى زىمىران ۇشىرىلىمىن جۇزەگە اسىردى. سولتۇستىك كورەيالىق زىمىران شامامەن 500 شاقىرىم ۇشىپ بارىپ، جاپونيانىڭ ايرىقشا ەكونوميكالىق ايماعىنا تاياۋ جەرگە قۇلادى. جاپوندىق جانە وڭتۇستىك كورەيالىق اسكەريلەردىڭ دەرەكتەرىنە سايكەس، ك ح د ر باتىسىنداعى پۋكچحان ۋەزى اۋماعىنان ۇشىرىلعان زىمىران شامامەن 500 شاقىرىم ۇشىپ، جاپون تەڭىزىنە قۇلاعان.
اۆتور: ايجان سەرىكجان
