ارىستان سەرىگىن قولتىراۋىننان قۇتقارىپ قالدى

استانا. قازاقپارات - ۆيدەوجازبانى بوتسۆان جانە ناميبي شەكارالارىنداعى لينيانتي وزەنى اۋدانىنا سافاريگە شىققان تۋريستەر تۇسىرگەن. سۋ ءىشىپ تۇرعان ەكى ارىستاندى اڭعارعان تۋريستەر كامەرالارىن ىسكە قوسقان.

 ارتىنشا كىشىرەك ارىستان سۋعا ءتۇسىپ وزەندى كەسىپ وتپەك بولادى، ۇلكەن سەرىگى دە سوڭىنان ىلەسەدى. الايدا ەكەۋى وزەننىڭ ەكىنشى جاعىنا وتە المادى: ءبىر شەتتەن شىعا كەلگەن قولتىراۋىن كىشكەنتاي ارىستانعا تارپا باس سالادى. ۇلكەنى دەرەۋ كومەككە كەلىپ، تويتارىس بەرەدى. كىشكەنتاي ارىستان بوتسۆان جاعاسىنا جالعىز ءوزى ورالدى، ال ونىڭ قورعاۋشىسى قولتىراۋىنمەن سۋ استىنا باتىپ كەتتى. تۋريستەر العاشىندا ارىستاندى قولتىراۋىنمەن شايقاستا ءولدى دەپ ويلادى. الايدا ءبىرازدان سوڭ ولار ارىستاننىڭ وزەن جاعاسىنداعى قامىستاردىڭ اراسىنان شىعىپ كەلە جاتقانىن اڭعاردى. تۋريستەردىڭ الىستان باقىلاعانىنداي ەكى اڭ دا ەش جارالانباعان.