استانادا ءۇش ساياباقتا تۇرعىندار ءۇشىن تەگىن جاتتىعۋلار وتكىزىلەدى

CrossFit, Zumba-dancing, combat-battle، دجيۋ-دجيتسۋ جانە يوگا. قالا اكىمدىگى سايتىنىڭ حابارلاۋىنشا، سپورتتىق شارالار ەكسپو-2017 حالىقارالىق مامانداندىرىلعان كورمەسى اياسىندا ىسكە اسادى.
«شارانى ءبىز وسىمەن ەكىنشى جىل قاتارىنان ۇيىمداستىرىپ جاتىرمىز. جاڭا ماۋسىم وتكەن دەمالىس كۇنى باستالدى. بىلتىرعى جىلمەن سالىستىرار بولساق، نەگىزگى ەرەكشەلىكتەرى ءبىزدىڭ اۋقىمىمىز كەڭەيدى، تاعى «ستۋدەنتتەر»، «جەرۇيىق» ساياباقتارى قوسىلدى. بارلىق الاڭداردا ءبىر ۋاقىتتا، تاڭەرتەڭ ساعات 10 دا جالپى دەنە شىنىقتىرۋ جاتتىعۋلارى جاسالادى»، - دەيدى شارانى ۇيىمداستىرۋشى اسان ءجۇنىسوۆ.
«ءبىز ادامداردىڭ سپورتقا دەگەن قۇلشىنىسىنا سەنەمىز. شارامىز الەۋمەتتىك جانە تەگىن تۇردە جۇرگىزىلەدى. قاتىسۋشىلار سانىنىڭ ارتىپ جاتقانى قۋانتادى. ەگەر وتكەن جىلى ەكىنشى جاتتىعۋلارعا 30 ادام عانا كەلسە، ال بۇگىن تەك «استانالىق» ساياباعىندا جاتتىعۋ باستالعانعا دەيىن 100 دەن استام تۇرعىن تىركەلدى»، - دەدى ۇيىمداستىرۋشى.
استانانىڭ كوپتەگەن تۇرعىندارى ءۇشىن «Fitness Park Astana»- سۇيىكتى شاراعا اينالدى. الايدا اراسىندا العاش قاتىسىپ جاتقاندار از ەمەس.
كروسس-فيت بويىنشا باپكەر روماننىڭ ايتۋىنشا، وعان جاتتىعۋعا كاسىپكەرلەردەن باستاپ، ءۇي شارۋاسىنداعى ايەلدەر بالالارىمەن بىرگە كەلەتىن كورىنەدى.
«بيىل جاڭادان قاتىسۋشىلار كوپ. كروسس-فيت سپورتتىڭ اۋىر ءتۇرى ەكەنىن ەسكەرسەك، بىزگە دايىندىعى ءارتۇرلى ادامدار كەلە باستادى. بۇل ارينە، قۋانتادى. باستىسى، قۇلشىنىس ەمەس پە؟ ءبىز بارلىق ءۇش الاڭدا جاتتىعۋلار جۇرگىزەمىز جانە ءار جەكسەنبى كۇندەرى وسىلاي بولادى دەپ ۇمىتتەنەمىز»، - دەيدى ول.
شارانىڭ نەگىزگى مىندەتى - قالا تۇرعىندارىنىڭ ۋاقىتىن ءتيىمدى ءارى دەنساۋلىققا پايدالى ەتىپ ۇيىمداستىرۋ. يۋليانىڭ ايتۋىنشا، combat-battle جاتتىعۋىنا ەكى كىشكەنتاي قىزىمەن كەلگەن.
سپورتپەن زالعا قاراعاندا، دالادا شۇعىلدانعان الدەقايدا جاعىمدى ءارى قىزىقتى. «ماعان وتە قاتتى ۇنادى. ال بالالار تاڭعالىسىندا شەك جوق. ءبىراق ءبىز بۇل جەرگە العاش رەت كەلدىك. ۇلكەن اسەر الدىم. بۇل جەردە ەرەكشە ەنەرگەتيكا بار. كەلەسى دەمالىس كۇنى مىندەتتى تۇردە قايتا كەلەمىز»، - دەيدى قاتىسۋشى يۋليا.
ەستەرىڭىزگە سالامىز، «Fitness Park Astana» جوباسى «استانالىق»، «جەرۇيىق»، «ستۋدەنتتەر» ساياباعىندا 10-قىركۇيەككە دەيىن جالعاسادى. جاتتىعۋ جەكسەنبى كۇندەرى ساعات 10:00 دە وتكىزىلەدى. استانادا جوبا قالالىق اكىمدىكتىڭ قولداۋىمەن ۇيىمداستىرىلۋدا.