15:16, 21 - مامىر 2017 | GMT +5
قازاقستان ساداق اتۋ قۇراماسى الەم كۋبوگىندا التىن الدى
استانا. قازاقپارات - ساداق اتۋدان شاڭحايدا (قىتاي) اياقتالعان الەم كۋبوگىنىڭ ءبىرىنشى كەزەڭىندە قازاقستان ەرلەر قۇراماسى كوماندالىق جارىستا التىن مەدال يەلەندى.

قازاقستاندىق دەنيس گانكين، ويرات سايدييەۆ، سانجار مۇسايەۆ ۇشتىگى فينالدا وليمپيادا چەمپيوندارى وڭتۇستىك كورەيا قۇراماسىن 5:4 ەسەبىمەن جەڭدى. قازاقستان قۇراماسى فينالعا دەيىن اقش، رەسەي، جاپونيا كوماندالارىنان باسىم تۇسكەن.
بۇل - قازاقستاننىڭ ساداق اتۋدان الەم كۋبوگى تاريحىندا العان العاشقى مەدالى. الەم كۋبوگىنىڭ ەكىنشى كەزەڭى 6-11 - ماۋسىمدا انتاليادا (تۇركيا) وتەدى.