ماسكەۋدەگى ۇلى ابايدىڭ ەسكەرتكىشى ورنالاسقان الاڭدا دومبىرا ءۇنى اۋەلەدى-فوتو

قازاقستاندىق تالانتتى جاستار كوپشىلىك الدىندا بەلگىلى كۇي شەبەرلەرىنىڭ تۋىندىلارىن ورىندادى. جىل سايىن وتكىزىلۋى داستۇرگە اينالىپ كەلە جاتقان «دومبىرا- party» اكسياسى سەنبىلىك كەشتە سەرۋەن قۇرعان رەسەي استاناسىنىڭ تۇرعىندارى مەن قوناقتارىنىڭ نازارىن اۋداردى. كەز كەلگەننىڭ دومبىرا ۇنىنەن ءلاززات الۋ مۇمكىندىگى بولدى.
«دومبىرا- party» ۇيىمداستىرۋشىلارى قازاقستاندىق ستۋدەنتتەر - ر ف س ءى م ديپلوماتيالىق اكادەمياسىنىڭ تىڭداۋشىلارى نۇرلان بەرتىسوۆ پەن تالانت وڭعاروۆ، ۇزۋ ە ج م- ءىنىڭ ماگيسترانتى ءسانيا جۇمابايەۆا، سونداي- اق، ماسكەۋدەگى «مۇراگەر» قازاق مادەنيەتى قوعامىنىڭ بەلسەندى جاستارى. ۇيىمداستىرۋشىلاردىڭ ايتۋىنشا، اتالمىش اكسيا قازاقستان مەن رەسەي اراسىنداعى ديپلوماتيالىق بايلانىسقا 25 جىل تولۋى اياسىندا وتكىزىلىپ وتىر. ونىڭ ماقساتى - ۇلتتىق ءداستۇرىمىز بەن قازاق مادەنيەتىن ناسيحاتتاۋ، سونىمەن قاتار، قازاقتىڭ ۇلتتىق باي مادەني ونەرىن شەتەلدىكتەرگە تانىستىرۋ.
«كەز كەلگەن حالىق ءوزىن ءتىلى، مادەنيەتى، سالت- ءداستۇرى ارقىلى تانىتادى. قازاقستان پرەزيدەنتى ن. ءا. نازاربايەۆ ءوزىنىڭ «بولاشاققا كوزقاراس: قوعامدىق سانانى جاڭعىرتۋ» ماقالاسىندا ۇلتتىق ەرەكشەلىگىمىزدى ساقتاپ قالۋدىڭ ماڭىزدىلىعى جايلى اتاپ ءوتتى. ماقالادا كوتەرىلگەن ماسەلەلەردىڭ ماڭىزدىلىعىن ەسكەرەك وتىرىپ، قازاق حالقىنىڭ مۋزىكاسى مەن مادەنيەتىن ناسيحاتتاۋ ماقساتىمەن ءبىز بۇل شارانى تاعى ءبىر مارتە وتكىزۋدى ءجون كوردىك»، - دەيدى اكسيا ۇيىمداستىرۋشىلارىنىڭ ءبىرى تالانت وڭعاروۆ.