اقتوبەدە وتكەن ايتىستا ەلدى بىرلىككە شاقىرعان اقىن جەڭىسكە جەتتى-فوتو

اقتوبە. قازاقپارات اقتوبەدە «اقتوبەم مەنىڭ، ەڭسەلى، جىرىما قوسام مەن سەنى» اتتى رەسپۋبليكالىق ايتىس ءوتتى، دەپ حابارلايدى قازاقپارات ءتىلشىسى.

سوڭعى جىلدارى اقتوبەدە رەسپۋبليكالىق اقىندار ايتىسىن وتكىزۋ داستۇرگە اينالدى. وتكەن جىلى قازاق حاندىعىنىڭ 550 جىلدىعىنا ارنالسا، بيىل اقتوبە وبلىسىنىڭ 85 جىلدىعىنا وراي وتكىزىلدى. «نۇر وتان» پارتياسىنىڭ قولداۋىمەن اقتوبە وبلىسىنىڭ اكىمدىگى، تىلدەردى دامىتۋ باسقارماسى ەلىمىزگە تانىمال ءسوز شەبەرلەرىن شاقىرىپ، اقتوبەلىكتەر ەكى كۇن بويى ەل مەن جەردى، ۇلتتىق قۇندىلىقتارىمىز بەن ىشكى، سىرتقى ساياساتتى جىرلاعان ايتىستى تاماشالادى.

ال بۇگىن باس جۇلدە اقىن تولەگەن جامانوۆقا بۇيىردى. جۇلدەگە 2 ميلليون تەڭگە بەرىلدى. ال ءبىرىنشى ورىندى رينات زايىتوۆ يەلەندى. جانسايا مۋسينا ەكىنشى ورىن الدى. ءۇشىنشى ورىن ءۇش اقىنعا بەرىلدى. ولار: ماقسات اقانوۆ، مەيرام سۇلتانحان، ديدار قاليەۆ.

ايتىستى جۇرگىزگەن ءجۇرسىن ەرمان ءوز سوزىندە، «كەزىندە مەتسيناتتاردىڭ دەمەۋىمەن جولعا تۇسكەن اقىندار ايتىسى قازىر بيلىكتە جۇرگەن، ۇلتقا جانى اشيتىن 4-5 اكىم ارقاسىندا كۇن كورىپ جاتىر» دەدى.

ايتىس جۇلدەگەرلەرىن وبلىس اكىمى بەردىبەك ساپاربايەۆ قۇتتىقتاپ، ايتىسكەرلەرگە اقتوبەلىكتەر اتىنان العىس ايتتى.

«ەل بولاشاعى رۋحىمىزدىڭ مىقتىلىعىنا بايلانىستى. ال رۋحاني بايلىعىمىزدىڭ ءبىرى، باياعىدان كەلە جاتقان، بابالارىمىزدان تاراعان ايتىس. ايتىس ناعىز ءسوزدىڭ شەشەنىنەن تۋعان. ءبىز جانسايا مەن تولەگەننىڭ ايتىسىن كوردىك. تولەگەن تاۋىپ ايتتى. ول: «بىرلىك بولسىن، بىرلىك بولماسا جوڭعارلار سياقتى جويىلامىز» دەدى. قانداي كەرەمەت ءسوز. وسى ءسوزدى ۇمىتپاۋ كەرەك»، - دەدى بەردىبەك ساپاربايەۆ.

ەكى كۇنگە سوزىلعان ايتىس كەزىندە رينات زايىتوۆتىڭ ءسوزى ەل اۋزىندا قالدى. ول اقتوبەلىك اقىنعا «اتىڭ دا، شاپانىڭ دا كەرەك ەمەس، شىعىسقا بەردىبەك ساپاربايەۆتى قايتارساڭدار ەكەن» دەدى.

«اي ديدارلى اقتوبەدەي قالاڭ بار،

تۋىلمايدى مۇندا تەگىن ادامدار.

تابانىمەن تىرەپ جاتقان ىرگەڭدى،

 تاۋ تۇلعالى تاما ەسەتتەي باباڭ بار» ، - دەگەن رينات زايىتوۆ اقتوبەلىكتەرگە ريزاشىلىعىن ءبىلدىردى.

اۆتور: التىناي ساعىندىقوۆا