بۇلاعى - تانگە شيپا، دۇعاسى - جانعا دەمەۋ المەرەك اۋليە

الماتى. قازاقپارات - قازاق دالاسى ايتىلعان دۇعا، تىلەنگەن تىلەك قابىل بولاتىن قاسيەت تۇنعان جەرلەرگە باي ەكەندىگى اقيقات.

سونداي كيەلى جەرلەردىڭ زامانىنىڭ كوسەمى، ابىزى، باتىرى بولعان المەرەك بابا جاتقان جەر. الماتىدان 30 شاقىرىم سولتۇستىككە قاراي زيرات باسىنا كەسەنە سوعىلعان.

بۇلاعى - تانگە شيپا، دۇعاسى - جانعا دەمەۋ المەرەك اۋليە ۇلى ءجۇزدىڭ البان رۋىنان شىققان المەرەك باتىر 22 جاسىندا قالماقتىڭ شونجى دەگەن باتىرىنىڭ باسىن العان ەكەن. اسقان باتىرلىعىمەن كوزگە تۇسكەن جاس جىگىت ءومىرىنىڭ ورتا شاعىندا رۋباسى، ايتقانى ايداي كەلگەن اۋزى دۋالى ابىز بولعان ەكەن. ءيىسى قازاققا بەلگىلى رايىمبەك باتىر، ءمۇيىزدى وتەگەن، مالاي سىندى باتىرلار جورىققا شىعاردا المەرەكتەن باتا العان دەسەدى.

المەرەك تاۋكە حاننىڭ جەتى جارعىسىن جازۋعا ات سالىسقان جەتىسۋدىڭ ىقپالدى ازاماتتارىنىڭ ءبىرى بولعان.

ونىڭ اۋليەلىگى جايلى ايتىلىپ جۇرگەن ءتامسىل كوپ.

«بىردە المەرەك تۇسىندە ايان الىپ، نايمان ەلىنىڭ كوسەمىنە شابارمان جىبەرەدى. ەلىڭدى الىسقا كوشىر، جاۋ شابادى دەپ. المەرەكتىڭ ول كەزدە دارەجەسى اسا وسە قويماعان كەز. نايمان ەلىنىڭ كوسەمى ايدالاداعى المەرەكتىڭ ءتۇسىن نەعىلسىن. شابارماندى ساباپ ساباپ قويا بەرەدى. الايدا، از كۇن وتە سالىسىمەن نايماندى قالماق قىرىپ كەتەدى. سول كەزدە 2 وگىزىمەن عانا قالعان رۋباسى المەرەكتىڭ الدىنا جىعىلىپتى- مىس. سودان ونىڭ ابىرويى اسقاقتاپ كەتكەن ەكەن» ، - دەدى شىراقشى ءسابيت سۇيگەنباي ۇلى.

المەرەكتىڭ 3 نەكەدەن 8 ۇلى قالعان ەكەن. ولاردىڭ 5 ءى رۋلىق دارەجەگە جەتكەن.

«ءۇش انامىز 3 جۇزدەن ەكەن. ۇلكەن انامىز شاپىراشتىنىڭ قىزى، ورتانشى انامىز ورتا ءجۇزدىڭ قىزى. كىشى انامىز كىشى ءجۇزدىڭ قىزى دەپ توپشىلايمىز. ۇيتكەنى 80 اسقاندا نەكەلەنىپ، ول كىسى ەدىل، جايىق، جۇمىق دەگەن 3 ۇل تۋىپ بەرگەن. بالالاردىڭ اتىنا قاراپ، سول ورال جاقتىڭ قىزى بولسا كەرەك دەدىك» ، - - دەدى س. سۇيگەنباي ۇلى.

 ءبىر قىزىعى، بابالارىنىڭ جاتقان جەرىن ۇرپاعىنىڭ كوپشىلىگى بىلمەگەن.

«ءدىنمۇحامەد بالا كەزىندە اكەسى مەڭدىاحمەت ەكەۋى ساپار شەككەندە ات باسىن بۇرىپ قۇران باعىشتاپ وتەدى ەكەن. كەيىن الباننىڭ اتقا مىنگەن ۇلدارىن كورسە سۇرايدى ەكەن. اكەلەرىڭنىڭ جاتقان جەرىن بىلەسىڭدەر مە دەپ. تاۋەلسىزدىك كەلگەن سوڭ بارلىعى جوعالعانىن ىزدەي باستادى ەمەس پە» ، - دەدى شىراقشى س. سۇيگەنباي ۇلى.

ءسويتىپ دىنمۇحامەد قونايەۆتىڭ كورسەتۋىمەن 90 -جىلدارى ارتىندا قالعان ۇرپاقتارى جينالىپ اس بەرىپ، باسىن كوتەرگەن ەكەن.

سول كەزدە قاراپايىم مازاردىڭ اينالاسىنا شاعىن باق وتىرعىزىلىپ، عيبادات بولمەسى سالىنعان ەكەن.

  قازىر بۇل ورىن اۋرۋىنا شيپا ىزدەگەن جانداردىڭ اعىلىپ كەلەتىن ورنىنا اينالدى. تۋرا توبەنىڭ استىندا بۇلاق اعىپ جاتىر. بۇلاق سۋىن ىشكەن ادام دا جۋىنعان ادام دا اۋرۋىنا شيپا تابادى.

سۋدىڭ حيميالىق قۇرامىن زەرتحانادان وتكىزگەندە، ونىڭ قۇرامىندا اۋىر مەتال مۇلدە جوق، كۇمىسى مول ەكەنى انىقتالدى. جاقىندا توبەشىكتىڭ جوعارعى جاعىنان بۇلاقتىڭ تاعى ەكى كوزى اشىلدى. ول جەردە قىستىڭ قاقاعان ايازىندا دا ادامدار قۇيىنادى.

بۇل جەردىڭ قاسيەتى تۋرالى ەل اۋزىندا اڭگىمە كوپ. بالا كوتەرمەي جۇرگەن كەلىنشەكتەردىڭ كوبى ءسابي سۇيگەن. سۋ قاراڭعى سوقىر قىزدىڭ كوزىنە ساۋلە جۇگىرگەن دەسەدى. مازار ماڭىندا ءبىر تۇنەپ اشى سۋعا قۇمارلىقتان ارىلىپ جاتقاندار قانشاما.

ءتىپتى، سوناۋ ماسكەۋدەن، ومسكىدەن تۋريستىك ماقساتتا كەلىپ رۋحاني كۇش الىپ كەتىپ جاتقاندار بارشىلىق. ءدال وسىنداي ادامدى سابىرعا شاقىراتىن، كوڭىلگە دەمەۋ بەرەتىن، رۋحاني تازارۋعا سەپ بولاتىن كيەلى جەردىڭ كوپ بولعانى قازاقتىڭ وسى ۋاقىتقا دەيىن ءوزىن جوعالتۋىنان ساقتاپ كەلەدى.

 مۇنىڭ ءوزى مەملەكەت باسشىسى ايتقانداي، تۇتاسا كەلگەندە حالقىمىزدىڭ ۇلتتىق بىرەگەيلىگىنىڭ مىزعىماس نەگىزىن قۇرايدى.

 

اۆتور: گۇلميرا ءعوسمانالي