شىعىس قازاقستاندا اتتەستاتسيادان وتە الماعان ەكى اكىم جۇمىسىنان بوساتىلدى
تەستىلەۋ 1 -اقپان - 5 -ءساۋىر ارالىعىندا ءوتتى. وعان «ب» كورپۋسىنىڭ 5464 مەملەكەت قىزمەتشىسى قاتىستى.
اتتەستاتسيا قورىتىندىسىنا سايكەس، 16 مەملەكەتتىك قىزمەتشى جۇمىسىنان بوساتىلدى، 52 ادام لاۋازىمىن تومەندەتۋگە ۇسىنىلدى، 5119 قىزمەتكەر الىپ وتىرعان لاۋازىمدارىنا سايكەس كەلەدى دەپ تانىلسا، قالعان 277 سى جوعارى تۇرعان قىزمەتكە ۇسىنىلدى.
«جۇمىستان شىعارىلعاندار اراسىندا اۋىلدىق وكرۋگتىڭ ەكى اكىمى بار - كوكپەكتى جانە قاتەلەسپەسەم، ۇلان اۋداندارىنىڭ. قىزمەتىنەن بوساتىلعاندار اراسىندا وبلىستىق باسقارمالاردىڭ ماماندارى دا بار. جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىندا باس مامان ءوز ورنىن بوساتتى»، - دەپ ءمالىم ەتتى ق ر مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ ش ق و بويىنشا دەپارتامەنتى باسشىسىنىڭ مىندەتىن اتقارۋشى جاننا قابدولدا قىزى.
مەملەكەتتىك قىزمەتشىلەردى باعالاۋ كريتەريلەرى ءتورت بلوكقا توپتاستىرىلدى: تيىمدىلىك، حالىققا قىزمەت ەتۋ، اشىقتىق جانە ەسەپ بەرۋ. سونداي-اق ولاردىڭ جاۋاپكەرشىلىك، باستاماشىلدىق جانە كۇيزەلىسكە توزىمدىلىك سىندى جەكە باس قاسيەتتەرى دە نازارعا الىندى.
اۆتور: ميرا تولەندى قىزى
