جاياۋ جۇرگىنشىلەردى كولىگىمەن باسىپ وتكەن امەريكالىققا قاتىستى سوت وتىرىسى باستالدى

استانا. قازاقپارات - نيۋ- يوركتىڭ تايمس- سكۆەر الاڭىندا جاياۋ جۇرگىنشىلەردى كولىگىمەن جانشىپ وتكەن ريچارد روحاس وتستاۆكاداعى امەريكالىق اسكەري قىزمەتشى.

مانحەتتەندەگى فەدەرالدى سوتتا باستالعان سوت وتىرىسىندا وعان ادام ءولتىرۋ جانە ادام ولتىرۋگە وقتالۋ ايىپتارى تاعىلدى، دەپ حابارلايدى قازاقپارات Associated Press (ا ر) اگەنتتىگىنە سىلتەمە جاساپ.

ەسىرتكىگە ەلىككەن كۇيدە Honda Accord كولىگىن باسقارعان 26 جاستاعى روحاس بەيسەنبى كۇنى تاڭەرتەڭ جوعارى جىلدامدىقتا جۇيىتكىپ كەلە جاتىپ، تايمس-سكۆەر الاڭىنىڭ تروتۋارىنا شىعىپ كەتتى.

وقيعا سالدارىنان 22 ادام جاراقات الدى، 18 جاستاعى قىز سول ورىندا كوز جۇمدى. ا ر مالىمەتىنشە، سوت وتىرىسىندا سۋديا روحاستان ءوز كىناسىن مويىندايتىنىن، نە مويىندامايتىنىن سۇراعان جوق. وتىرىس بارىسىندا پروكۋراتۋرا قىزمەتكەرلەرى اتاپ وتكەندەي، روحاس ۇستالعاننان كەيىن ادامداردىڭ بارلىعىن ولتىرگىسى كەلگەنىن جانە پوليتسەيلەر ونى اتىپ ولتىرگەنىن قالايتىنىن ايتقان.

سوتقا ۇسىنىلعان قۇجاتتارعا سايكەس، روحاس 2011 -جىلى ا ق ش- تىڭ اسكەري تەڭىز كۇشتەرىندە قىزمەتتەن وتكەن، ال 2013 -جىلى وڭتۇستىك كوروليناداعى تۇرمەدە ەكى اي وتىرعان. وعان سول كەزدە قانداي ايىپتار تاعىلعاندىعى جازىلماعان. اسكەري تريبۋنالدىڭ شەشىمىمەن ول 2014 -جىلى اسكەري قىزمەتتەن بوساتىلدى. نيۋ-يوركتەگى ءىس بويىنشا كەلەسى سوت وتىرىسى كەلەسى اپتادا جالعاسادى.

ايتا كەتەيىك، نيۋ-يورك بيلىگى بۇل وقيعانى لاڭكەستىكپەن بايلانىستىرمايتىنىن ءمالىم ەتتى.